U23 DÇ-də üç idmançımız bürünc medal uğrunda mübarizə aparacaq

Serbiya'nın Novi Sad şəhərində davam edən U23 Dünya Çempionatı Azərbaycan güləşçiləri üçün gərgin keçir. Milli komandamızın üzvləri həm sərbəst, həm də qadın güləşi yarışlarında mübarizə apardılar. Yarışların bu günkü hissəsi bitəndən sonra, üç idmançımız medal şansı qazanıb. Güləşçilərimizdən ikisi sabah birbaşa bürünc medal uğrunda xalçaya çıxacaq. Digər bir təmsilçimiz isə təsəlliverici görüşdə iştirak edərək medala gedən yolu açmağa çalışacaq.

Xüsusilə Günay Qurbanova (59 kq) və Maqomed-Başir Xaniyevin (74 kq) göstərdiyi çıxışlar diqqət mərkəzində oldu. Onlar ağır döyüşlərdən sonra yarımfinalda məğlubiyyətə uğrasalar da, Azərbaycana medal gətirmək şansını itirməyiblər. Qadın güləşçilərimizdən Günay Qurbanova çempionatda parlaq qələbələr seriyasına başladı. O, debüt görüşündə bolqarıstanlı Viktoriya Boynovaya 8:1 hesabıyla qalib gəldi və rəqibinə heç bir şans vermədi.

Sonrakı mərhələlərdə də Günay üstünlüyünü qorudu; moldovalı Madalina Prisakariyə 11:0 hesabı ilə, qazaxıstanlı Viktoriya Xusaynovaya isə tuşla vaxtından əvvəl qalib gəldi. Bu, onu yarımfinala yüksəltdi, lakin burada yaponiyalı Ruka Natami ilə çətin bir qarşılaşma oldu. Günay son saniyələrə qədər mübarizə aparsa da, 1:3 hesabı ilə qələbəni əldən verdi. Buna baxmayaraq, Qurbanova sabah bürünc medal uğrunda döyüşəcək.

Sərbəst güləş yarışlarında Maqomed-Başir Xaniyev (74 kq) inamlı çıxışı ilə yadda qaldı. O, turnirə yunanıstanlı Georgios Yoakeymidisə qarşı 10:0 hesabı ilə tam üstünlüklə qalib gəlməklə başladı. Təmsilçimiz 1/8 finalda ermənistanlı Qriqor Çolakyandan 14:5 hesabı ilə daha güclü oldu. Daha sonra Bəhreyn idmançısı Maqomedrasul Asluyevə 7:3 hesabı ilə qalib gələrək yarımfinala yüksəldi. Xaniyev finala çıxmağa bir addım qalmış Türkiyə təmsilçisi Muhammed Özmuşa 3:7 hesabı ilə məğlub oldu. Maqomed-Başir Xaniyev də Günay Qurbanova kimi, sabah bürünc medal uğrunda mübarizə aparacaq.

92 kq çəki dərəcəsində mübarizə aparan Sadiq Mustafazadə ispan rəqibini 10:0 hesabı ilə mübarizədən kənarlaşdırsa da, 1/8 finalda İran idmançısı Mohammadmobin Azimiylə başa çıxa bilmədi (0:8). Mustafazadənin rəqibi finala çıxdığı üçün, həmyerlimiz sabah təsəlliverici görüşə çıxacaq və medal şansını qoruyacaq. Elnurə Məmmədova (53 kq) türkiyəli rəqibinə qalib gəlsə də, 1/4 finalda İspaniya idmançısına uduzdu. Birgül Soltanova (62 kq) isə təsnifat mərhələsində rusiyalı Yekaterina Koşkinaya məğlub oldu və mübarizəni dayandırdı.