Xaçmazın Qıraqlı kəndində səyyar qəbul keçirilib (FOTO)

Xaçmaz Rayon İcra Hakimiyyətinin (RİH) başçısı Elnur Rzayev Qıraqlı kəndində səyyar qəbul keçirib. Bu görüşdə yerli hüquq-mühafizə orqanlarının, eləcə də idarə, müəssisə və təşkilat rəhbərləri də iştirak ediblər.

Qəbul zamanı Çinartala İnzibati Ərazi Dairəsi üzrə nümayəndəliyə daxil olan bir neçə kəndin sakinlərinin müraciətləri dinlənilib. Bunlar Qıraqlı, Çinartala, Manafoba, Ağaşirinoba və Palçıqoba kəndlərindən olan vətəndaşlar idi. Sakinlər əvvəlki səyyar qəbullarda səsləndirilən bəzi müraciətlərin həlli istiqamətində görülən işlərə görə məmurlara təşəkkürlərini bildiriblər.

Vətəndaşlar daha sonra mövcud olan problemlər haqqında danışdılar. Onların əsas müraciətləri yolların təmiri, elektrik təsərrüfatının yenilənməsi kimi infrastruktur işləri ilə bağlı idi. Eyni zamanda, həyatyanı torpaq sahələrinin ayrılması, tibb məntəqəsinin və mədəniyyət evinin açılması ilə bağlı xahişlər səsləndirilib.

Rayon İcra Hakimiyyətinin başçısı Elnur Rzayev kənd sakinlərinin bütün arzu və təkliflərini həssaslıqla dinlədi. O, vətəndaşları narahat edən problemlərin aradan qaldırılması üçün müvafiq tapşırıqlar verdi. Bir çox müraciətlər qəbul zamanı yerindəcə həll olundu.

Sonda sakinlər əhalinin problemlərinin həll edilməsi məqsədilə yerlərdə həyata keçirilən tədbirlərə, göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.