“Xarı Bülbül” çilçırağının təqdimat mərasimi keçirilib - FOTO

“Museum Furniture showroom”da Azərbaycanın milli simvolu olan “Xarı Bülbül” çilçırağının təqdimat mərasimi keçirilib. Bu layihənin hazırlanması ideyası “Museum Furniture” şirkəti tərəfindən irəli sürülüb. Tədbir Qarabağ mövzusuna həsr olunmuş zəngin mədəni proqramla yadda qaldı. Mərasimdə milli musiqi alətləri səsləndirildi, xalq rəqsləri nümayiş olundu və Qarabağ xalçaları təqdim edildi. Qeyd olunur ki, “Xarı Bülbül” artıq Azərbaycanın simvoluna çevrilib, bu motivin bədii əşyada istifadə edilməsi böyük maraq doğurur.

Bu unikal layihənin həyata keçirilməsi bir ildən çox vaxt apardı. Layihə Azərbaycanın zəngin mədəni irsinə və tarixinə həsr edilib. Çilçıraq İtaliyalı mütəxəssislərlə əməkdaşlıq çərçivəsində reallaşdırıldı. Dizayn prosesi İtaliyanın Neapol şəhərində yerləşən “i Borbone” brendi ilə birgə aparıldı. Bu əməkdaşlıq zamanı italyalı tərəfdaşlara Azərbaycan tarixi və mədəniyyəti haqqında geniş məlumat verildi. Mütəxəssislər milli irsin detallarını öyrənərək dizayna daxil etdilər.

Tədbirdə vurğulanıb ki, “Xarı Bülbül” çilçırağı iki mədəniyyətin – Azərbaycan və İtaliyanın dostluq və birliyini simvolizə edir. Bildirilir ki, bu əşya sadəcə bir dizayn nümunəsi deyil. O, xalqımıza, tariximizə və mədəniyyətimizə olan dərin ehtiramın bir ifadəsidir. Bu beynəlxalq əməkdaşlıq Azərbaycan mədəniyyətinin təbliği üçün də önəmli bir addım sayılır.