XİN: Azərbaycanın Fransa ilə ikitərəfli gündəliyində yeni dövrə start verilib

Xarici İşlər Nazirliyinin (XİN) Mətbuat xidməti idarəsinin rəisi Ayxan Hacızadə bildirib ki, Azərbaycanın Fransa ilə ikitərəfli gündəliyində yeni dövrə start verilib. Azərbaycan müstəqilliyinin ilk illərindən Fransa ilə qarşılıqlı hörmətə əsaslanan əməkdaşlığın qurulmasında maraqlı olub. Bu əlaqələr uzun bir tarixə söykənir. XİN rəsmisi xatırladır ki, 1993-cü ildə Ulu Öndər Heydər Əliyev Azərbaycan Prezidenti kimi xaricə ilk rəsmi səfərini məhz Fransaya edib. Eyni zamanda, 2003-cü ildə dövlət başçısı seçildikdən sonra Prezident İlham Əliyev də xaricə ilk rəsmi səfərini bu ölkəyə həyata keçirdi. Uzun illər mütəmadi şəkildə saxlanılan siyasi dialoq iki ölkə arasında iqtisadi və humanitar sahələrdə geniş əməkdaşlığın inkişafına böyük töhfə verib. Bu tarixi əlaqələr göstərir ki, Azərbaycan-Fransa münasibətləri həmişə strateji əhəmiyyət daşıyıb.

Lakin 44 günlük Vətən müharibəsi dövründə və müharibədən sonra Fransa tərəfindən atılan addımlar ikitərəfli əlaqələrə ciddi zərbə vurdu. Fransanın Azərbaycan əleyhinə verdiyi çoxsaylı bəyanatlar, habelə həm Senat, həm də Milli Assambleya tərəfindən ölkəmizə qarşı qəbul edilən qərəzli və həqiqətdən uzaq qətnamələr münasibətlərin getdikcə pisləşməsinə səbəb oldu. Bu neqativ təsir beynəlxalq platformalarda da özünü göstərdi. Fransanın BMT Təhlükəsizlik Şurasında, Avropa İttifaqı təsisatlarında, Avropa Şurasında və hətta ölkəmizin üzv olmadığı Frankofoniya təşkilatında irəli sürdüyü təşəbbüslər münasibətlərə mənfi təsir göstərdi. Ayxan Hacızadə əlavə edib ki, Azərbaycana qarşı aparılan qarayaxma kampaniyasına baxmayaraq, rəsmi Bakının atdığı addımlar və rəsmi bəyanatlar yalnız bu destruktiv fəaliyyətlərə cavab xarakterli idi. Azərbaycan qarşılıqlı hörmətə əsaslanan əlaqələr prinsipini qoruyub.

XİN rəsmisi vurğulayıb ki, yaranmış gərginliyə baxmayaraq, dialoq kanalları Azərbaycan tərəfindən həmişə açıq saxlanılıb. Ötən ilin oktyabr ayında Avropa Siyasi Birliyinin Kopenhagen toplantısı çərçivəsində Azərbaycan və Fransa prezidentləri arasında keçirilən görüş münasibətlərdəki anlaşılmazlıqları müzakirə etmək baxımından faydalı oldu. Bu görüşdən sonra siyasi təmaslar davam etdi və nəticədə ikitərəfli gündəlikdə yeni dövrə start verilib. Bu, Azərbaycan və Fransa arasında əlaqələrin normallaşdırılmasına doğru atılmış mühüm addımdır.