XİN: Braziliya ABŞ-nin idxal rüsumlarının tam ləğvinə nail olmağa çalışacaq

Braziliya hökuməti ABŞ-nin müəyyən kənd təsərrüfatı məhsullarına tətbiq etdiyi 40 faizlik tariflərin ləğv edilməsini alqışlayıb. Lakin ölkə rəhbərliyi Vaşinqton tərəfindən tətbiq edilən idxal tariflərinin qalan kateqoriyalar üzrə də aradan qaldırılması üçün səylərini davam etdirmək niyyətindədir. Ölkənin Xarici İşlər Nazirliyi (XİN) bu mövqe ilə bağlı rəsmi bəyanat yayıb.

Braziliya XİN təsdiqləyib ki, ABŞ tərəfi bəzi ət növləri, qəhvə, eləcə də manqo, kokos, ananas və digər meyvələrin idxalına tətbiq olunan 40 faizlik tarifləri ləğv edib. Braziliya rəhbərliyi ABŞ hökumətinin bir sıra kənd təsərrüfatı idxal məhsullarına əlavə 40 faizlik əlavə tarifləri ləğv etmək qərarını məmnuniyyətlə qarşılayıb. Qeyd edək ki, daha əvvəl ABŞ Prezidenti Donald Tramp Braziliyadan gətirilən bəzi kənd təsərrüfatı məhsullarına tətbiq olunan gömrük rüsumlarının azaldılması barədə fərman imzalamışdı.

Nazirliyin mətbuat xidməti açıqlamasında bildirir ki, Braziliya ABŞ ilə danışıqları davam etdirəcək. Məqsəd ikitərəfli ticarətdə qalan məhsullara tətbiq olunan əlavə rüsumların da ləğv edilməsinə nail olmaqdır. Bu danışıqlar Braziliyanın ABŞ bazarına maneəsiz çıxışını təmin etmək məqsədi daşıyır.