Yanğında tüstüdən zəhərlənənlərin son vəziyyəti açıqlandı

Kliniki Tibbi Mərkəz Bakıda baş verən yanğın hadisəsi zamanı tüstüdən zəhərlənən şəxslərin son durumu barədə məlumat yayıb. Ümumilikdə 27 nəfər tüstüdən zəhərlənmə diaqnozu ilə xəstəxanaya yerləşdirilib. Hazırda 7 nəfərin- 5 qadın və 2 kişinin müalicəsi Toksikologiya şöbəsində davam edir.

Bu yeddi xəstənin vəziyyəti tibbi heyət tərəfindən ciddi şəkildə izlənilir. Onlardan 6 nəfərin vəziyyəti orta ağır kimi qiymətləndirilir. Lakin, 1 nəfər azyaşlının vəziyyəti isə ağır olaraq qalır. Mərkəzdən verilən məlumata görə, xəstələrin tam sağalması üçün lazımi tibbi tədbirlər görülür.

Qeyd edək ki, hadisə 21.11.2025-ci il tarixində Yasamal rayonu, M.Seyidov küçəsi ərazisində yerləşən yaşayış binasında baş verib. Yanğın səbəbilə Kliniki Tibbi Mərkəzin Təcili tibbi yardım şöbəsinə hospitalizasiya olunan 27 nəfərdən 20-nə zəruri tibbi xidmətlər göstərilib. Bu şəxslərin arasında 13 kişi və 7 qadın var idi. Vəziyyəti qənaətbəxş hesab edilən 20 nəfər ambulator müalicə almaları üçün evə buraxılıblar.