Yasamalda 3 nəfərin ölümünə səbəb olan yanğınla bağlı vəzifəli şəxs həbs edilib

Noyabrın 21-də paytaxtın Yasamal rayonu, Mirəli Seyidov küçəsində yerləşən çoxmərtəbəli yaşayış binasında dəhşətli yanğın hadisəsi baş verdi. Bu faciə nəticəsində 3 sakin – Arzu Qəmbərli, Samir Məmmədov və Könül Hümbətova vəfat etdi. Bundan əlavə, 25 nəfər tüstüdən zəhərləndi, fərqli şəxslərə məxsus əmlaka da ziyan dəydi. Baş Prokurorluğun Kriminalistika və informasiya texnologiyaları idarəsində hadisə ilə bağlı cinayət işi başlanıb, ilkin istintaq hərəkətləri həyata keçirilir.

İstintaq zamanı Fövqəladə Hallar Nazirliyinin əməkdaşları və müvafiq ekspertlərin iştirakı ilə hadisə yerinə baxış keçirildi, maddi sübutlar götürüldü. Aparılan araşdırmalarla müəyyən olub ki, Yasamalda baş verən yanğın binanın zirzəmisində başlayıb. İstintaq orqanları yanğının başlamasına səbəb olan şəxsi müəyyənləşdiriblər. Şübhəli şəxs zirzəmi qatı və birinci mərtəbəsində yerləşən qeyri-yaşayış obyektini icarəyə götürən “TAXES GROUP” MMC-in (Loft Klinika) qanuni təmsilçisi – direktoru Bəhruz Paşayevdir.

Bəhruz Paşayev həbs edildi. Paşayevin üzərinə yanğın təhlükəsizliyi qaydalarına riayət edilməsi vəzifəsi qoyulmuşdu. O, bu qaydaları pozub ehtiyatsızlıqdan 3 şəxsin ölümünə, habelə digər ağır nəticələrə səbəb olmaqda şübhəli bilinir. O, noyabrın 23-də şübhəli şəxs qismində tutuldu. Bir gün sonra, noyabrın 24-də isə Paşayev Azərbaycan Respublikasının Cinayət Məcəlləsinin 225.3-cü maddəsi (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) ilə təqsirləndirilən şəxs qismində cəlb olundu.

İstintaq orqanının vəsatəti və prokurorun təqdimatı əsasında, Binəqədi Rayon Məhkəməsinin qərarı ilə B. Paşayev barəsində həbs qətimkan tədbiri seçildi. Hazırda cinayət işi üzrə ilkin istintaq davam edir. Baş vermiş hadisədə təqsirli olan bütün şəxslərin müəyyən edilərək qanuni məsuliyyətə cəlb olunmaları üçün zəruri istintaq və əməliyyat-axtarış tədbirləri həyata keçirilir.