Yeni Klinikada Sümük İliyi Transplantasiyası Mərkəzi fəaliyyətə başlayıb

Yeni Klinikada Sümük İliyi Transplantasiyası Mərkəzi fəaliyyətə başlayıb. Bu mərkəzin açılışı ölkə səhiyyəsi üçün böyük əhəmiyyət daşıyır, çünki o, müasir tələblərə cavab verən yüksək ixtisaslaşmış tibbi xidmətlər təklif edəcək. Bu barədə məlumatı Hematologiya və Sümük İliyi Transplantasiya Mərkəzinin şöbə müdiri Sevil Cəlilova Klinikada təşkil olunmuş mediatur zamanı açıqlayıb. O bildirib ki, mərkəzin fəaliyyəti hemato-onkoloji xəstəliklərin müalicəsində ən son elmi nailiyyətləri tətbiq edən, geniş təcrübəyə malik multidisiplinar komanda tərəfindən idarə olunacaq. Tibbi xidmətlər çərçivəsində, müvafiq diaqnozlarla müalicə alan pasiyentlər üçün həm allogen, həm də autogen sümük iliyi transplantasiyasının həyata keçirilməsi planlaşdırılır.

Mərkəz 22 çarpayılıq şöbə ilə fəaliyyət göstərəcək və böyüklər və uşaqlar üçün xidmət verəcək. Həm autogen, həm də allogen sümük iliyi transplantasiyası prosedurları beynəlxalq protokollara tam uyğun şəkildə həyata keçiriləcək. Bu yeni müalicə mərkəzi leykoz, talassemiya, aplastik anemiya, limfoma və mieloma kimi ağır xəstəliklərdən əziyyət çəkən pasiyentlər üçün yüksəksəviyyəli və inteqrasiya olunmuş müalicə şəraiti yaradır. Şöbə müdiri qeyd edib ki, transplantasiya blokları ciddi sterilizasiya standartlarına cavab verir. Onlar HEPA filtrasiyalı hava axını, tam izolyasiya rejimi və yüksəksəviyyəli infeksion nəzarət sistemi ilə təchiz olunub.

Yeni yaradılmış mərkəz ölkədə sümük iliyi transplantasiyası xidmətlərinin əlçatanlığını artırmağı qarşısına məqsəd qoyur. Mərkəzin əsas hədəfi pasiyentlərə təhlükəsiz, effektiv və keyfiyyətli müalicə təqdim etmək, eyni zamanda elmi yenilikləri praktikaya tətbiq etməkdir. Bu cür yüksək ixtisaslaşmış xidmətlərin ölkə daxilində təmin olunması xaricə bağlılığı əhəmiyyətli dərəcədə azaldacaq. Yeni Klinika bu mərkəz ilə hemato-onkoloji xəstəliklərin müalicəsində daha geniş imkanlar yaradır, müasir tibb standartlarının tətbiqində nümunəvi səhiyyə ocağı kimi fəaliyyət göstərməyə davam edəcək.