Yorğun və yuxusuz sürücü yoldakı ən böyük təhlükədir - BDYPİ

Baş DYP İdarəsi (BDYPİ) yol hərəkətinin təhlükəsizliyi ilə bağlı vacib xəbərdarlıq edib. Gün ərzində fasiləsiz yük və sərnişin daşıyan nəqliyyat vasitələrinin sürücülərinin yollarda hərəkəti böyük risklər daşıyır. Uzun müddət sükan arxasında qalmaq yorğunluğa səbəb olur, diqqəti zəiflədir və sürücünün reaksiya müddətini azaldır. Bu amillərin hamısı qəza ehtimalını kəskin şəkildə artırır.

Daxili İşlər Nazirliyi (DİN) bildirir ki, yorğun halda nəqliyyat vasitəsinin idarə edilməsi birbaşa təhlükəyə çevrilir. Bu təhlükə həm sürücünün özünün, həm daşıdığı sərnişinlərin, həm də digər yol hərəkəti iştirakçılarının həyatı və sağlamlığı üçün böyük risk yaradır. BDYPİ vurğulayır ki, yorğun və yuxusuz halda sükan arxasına əyləşmək, eləcə də sürət həddini aşmaq, zolaq dəyişərkən ehtiyatsız davranmaq ağır nəticələrə gətirib çıxarır.

İdarə həmçinin xatırladır ki, sükan arxasında diqqəti yayındıran hərəkətlərə yol vermək qadağandır. Unutmaq olmaz ki, sürücünün verdiyi hər səhv qərarın arxasında insan həyatı dayanır. Buna görə hər bir sürücü istirahətini vaxtında təmin etməli, diqqətini yalnız yola yönəltməli və nəqliyyat axınında təhlükə yarada biləcək davranışlardan çəkinməlidir. BDYPİ bütün sürücüləri yollarda məsuliyyətli olmağa və qaydalara ciddi əməl etməyə çağırır.