Zəfər xronikası. 8 noyabr 2020-ci il: Birinci vitse-prezident Mehriban Əliyeva Şuşa şəhərinin işğaldan azad edilməsi münasibətilə paylaşım edib (FOTO)

2020-ci il sentyabrın 27-də Ermənistan silahlı qüvvələrinin təxribatına cavab olaraq Azərbaycan Ordusu əks-hücum əməliyyatına başladı. Bu əməliyyat sonradan "Dəmir yumruq" adlandırıldı. 44 gün davam edən Vətən müharibəsi təxminən otuzillik işğala son qoydu və ölkəmizin ərazi bütövlüyünü bərpa etdi. Bu Zəfər xronikasının ən vacib hadisələrindən biri 2020-ci il noyabrın 8-də Şuşa şəhərinin azad edilməsi idi. Həmin gün Azərbaycanın Birinci vitse-prezidenti Mehriban Əliyeva rəsmi "İnstaqram" hesabında bu tarixi hadisə münasibətilə xalqa müraciət edib.

Mehriban Əliyeva bu anlarda bütün xalqın təsvirəgəlməz qürur və sevinc hissləri keçirdiyini bildirib. O, "Şuşa işğaldan azad edilib!" deyərək, bütün həmvətənlərini səmimi təbrik etdi. Birinci vitse-prezident qeyd edib ki, illər boyu davam etmiş kədər, həsrət və faciəli hadisələrdən sonra tarixi ədalət bərpa olunur. Vətəni müdafiə edən və əzəli Azərbaycan torpaqlarını azad edən qəhrəmanlar nəslinin bugünkü igidlikləri Azərbaycan tarixinə əbədi daxil olacaq, hər bir vətəndaşın yaddaşında həmişəlik qalacaq.

O vurğulayıb ki, Azərbaycan torpaqlarının hər qarışının azad edilməsi rəşadətli əsgərlərimizin qəhrəmanlığı, igidliyi, dözümlülüyü və qələbə əzmi sayəsində mümkün oldu. Vətən naminə canlarından keçmiş şəhidlərə rəhmət diləyən Mehriban Əliyeva "Biz Şuşamızı qaytardıq!" sözləri ilə sevincini bölüşdü. O, bütün uğurların və qələbələrin qarantı olan xalq-Prezident birliyinin möhkəmlənməsini arzulayıb. Məhz bu birlik Azərbaycanın gücünü nümayiş etdirməsinə imkan verir. O əlavə edib ki, milli həmrəylik, xalqın etimadı, inamı və dəstəyi sayəsində Prezident bütün mürəkkəb məsələlərin öhdəsindən uğurla gəlməyi bacarır. Müraciətinin sonunda Birinci vitse-prezident ordunun, xalqın, Vətənin və Prezidentin qorunması üçün dua edərək tarixi həqiqəti bir daha bəyan etdi: Şuşa bizimdir! Qarabağ Azərbaycandır!