Zəngəzur dəhlizi Özbəkistan üçün böyük maraq kəsb edir - Hikmətulla Raxmetov (ÖZƏL)

Özbəkistan Zəngəzur dəhlizinin yaxın zamanda istifadəyə verilməsinə böyük ümid bəsləyir. Bu layihə Mərkəzi Asiya ölkəsi üçün olduqca əhəmiyyətlidir. "Özbəkistan Dəmir Yolları" şirkətinin idarə heyətinin birinci sədr müavini Hikmətulla Raxmetov bu fikirləri Bakıda keçirilən MDB Dəmir Yolu Nəqliyyatı Şurasının 83-cü iclası çərçivəsində bildirib.

O qeyd etdi ki, dəhliz Özbəkistanın iqtisadi inkişafı üçün mühüm amil olacaq. Bu layihə Özbəkistanın ixrac və idxal əməliyyatlarının genişlənməsinə birbaşa təsir edəcək. Raxmetovun sözlərinə görə, dəhliz Özbəkistan ərazisindən başlayaraq Zəngəzur dəhlizinə, oradan isə Türkiyə və Avropaya yönələn tranzit yükdaşımaları üçün əsas yol açır. Özbəkistan bu marşruta yüksək nikbinliklə yanaşır.

Hikmətulla Raxmetov layihənin reallaşmasının gətirəcəyi faydalara diqqət çəkdi. Dəhlizin işə salınması, ilk növbədə, logistika xərclərini əhəmiyyətli dərəcədə azaldacaq. Bu, birbaşa daşıyıcıların xərclərinə müsbət təsir göstərəcək. İkincisi, dəhliz hər iki istiqamətdə daşınan yük həcminin artmasına gətirib çıxaracaq. Raxmetov vurğuladı ki, bu, həqiqətən də uzun müddətdir gözlənilən təşəbbüsdür, hətta onu on illərdir ki, gözləyirdilər. Özbəkistan Azərbaycanlı həmkarları ilə aktiv əməkdaşlıq edir və yeni marşrutdan tezliklə tam həcmdə uğurla istifadə etməyə başlamağa ümid edir.

Qeyd edək ki, dəhlizin reallaşması istiqamətində vacib diplomatik addımlar atılıb. Avqustun 8-də Vaşinqtonda Azərbaycan Prezidenti İlham Əliyev və Ermənistanın Baş naziri Nikol Paşinyan ABŞ Prezidentinin iştirakı ilə birgə bəyannamə imzalayıblar. Həmin sənəd regional əlaqələrin bərpası çərçivəsində Zəngəzur dəhlizinin istifadəyə verilməsini nəzərdə tutur. Həmçinin, iki ölkənin xarici işlər nazirləri "Sülh və Dövlətlərarası Münasibətlər haqqında" Sazişi paraflayıblar.