Əbülfəs Qarayevin qızının filminə qadağa qoyuldu

Mədəniyyət Nazirliyinin nəzdindəki Bədii Şuranın “Məhsəti” qısametrajlı bədii filminin Bakı Film Festivalında nümayişinə qadağa qoymasının səbəbi bəlli olub. Rejissor və ssenari müəllifi Suad Qara tərəfindən hazırlanan bu film ədəbiyyat irsimizə hörmətsizlik nümayiş etdirir. Bu, Azərbaycanın klassik ədəbi-mədəni tarixində xüsusi mövqeyə malik olan Məhsəti Gəncəvi obrazının bədii təqdimatında ciddi təhriflərə yol verildiyini göstərir. Şura bildirir ki, filmdə etik-normativ çərçivələrə açıq etinasızlıq göstərilir, görkəmli şairə Məhsəti Gəncəvi gəzəyən əxlaqsız qadın kimi təqdim edilir.

Obrazın mənəvi kimliyi ilə təqdim edilən səhnə və situasiyalar arasında nəzərəçarpacaq dərəcədə kobud uyğunsuzluqlar qeydə alınıb. Filmin ayrı-ayrı hissələrində mövzunun daxili məzmununa və Məhsəti Gəncəvinin ideya-mənəvi irsinə zidd olan sətiraltı mesajlar, manipulyativ təqdimatlar və kontekstdənkənar mənalandırma cəhdləri müşahidə olunur. Görkəmli şairəmiz Məhsəti Gəncəvinin zəngin irsi dövlət səviyyəsində qorunur və yüksək ideya-estetik dəyər kimi təbliğ edilir. Belə bir tarixi şəxsiyyətin həyat və irsinin primitivləşdirilməsi, təhrif edilməsi və qeyri-adekvat kontekstdə təqdim edilməsi qətiyyən yolverilməzdir. Bu cür təqdimat geniş ictimaiyyət, eləcə də ziyalı təbəqəsi tərəfindən ciddi narazılıqla qarşılanacaq.

Məhsəti Gəncəvinin erotik səhnələrlə təqdimatı, normativ-etik xarakterli ciddi pozuntular və konseptual uyğunsuzluqlar nəzərə alındı. Bu səbəbdən Azərbaycan Respublikasının Kino Agentliyinin (ARKA) Bədii Şurası “Məhsəti” filmi üzrə lisenziyanın verilməsini və qeydiyyata alınmasını məqsədəuyğun hesab etməyib. Filmin rejissoru Suad Qarayeva özünün instaqram hesabında paylaşım edərək, filmin məhz bu səbəbdən Bakı Film Festivalının proqramından çıxarıldığını təsdiqləyib. Şura filmin mənəvi dəyərlərə uyğun olmadığını əsas gətirib.

Rejissor S. Qarayeva paylaşımında filmin məzmunu haqqında ətraflı məlumat verib. O qeyd edib ki, filmdə Məhsəti obrazını canlandıran aktrisa dostları ilə kluba gedir, spirtli içki içir, rəqs edir və bir kişi ilə romantik münasibət yaşayır. Qeyd etmək lazımdır ki, Suad Qarayeva sabiq mədəniyyət naziri Əbülfəs Qarayevin qızıdır.