İkardi rekord qırmağa hazırlaşır

Ulduz hücumçu Mauro İkardi "Qalatasaray" klubunda iki böyük hədəfə doğru irəliləyir: 100-cü rəsmi oyununa çıxmaq və əfsanəvi Qeorqe Hagini geridə qoyaraq klub tarixinin ən çox qol vuran əcnəbi futbolçusu olmaq. Sabah "Trabzonspor"la keçiriləcək görüşdə meydanda olsa, argentinalı hücumçu İstanbul klubunda 100-cü yubiley oyununu keçirmiş olacaq.

1993-cü ildə Argentinanın Rosario şəhərində anadan olan İkardi gənc yaşda Avropa futboluna qədəm qoydu. O, karyerasına Kanar adaları komandasının gənclər akademiyasında başladı. Bu futbolçu qısa müddətdə diqqəti cəlb etdi və bu səbəbdən dünya nəhəngi sayılan “Barselona”nın gənclər akademiyasına transfer edildi. Kataloniya klubundan ayrıldıqdan sonra İkardi İtaliyanın “Sampdoriya”sına keçdi. Burada o, böyüklərlə birlikdə oynamaq şansı qazandı. Ordakı uğurlu çıxışlar İkardini İtaliyanın “İnter” və Fransanın PSJ kimi böyük komandalarının heyətinə daxil etdi.

İkardi 2022-2023 mövsümündə əvvəlcə PSJ-dən icarə əsasında “Qalatasaray”a gəldi. O, burada çıxışları ilə azarkeşlərin sevimlisinə çevrildi. Klub növbəti mövsümdə onu 10 milyon avroluq transfer qarşılığında daimi olaraq heyətinə qatdı. Hazırda Türkiyədə 4-cü mövsümünü keçirən Mauro İkardi "Qalatasaray"ın heyətində indiyə qədər 99 rəsmi oyuna çıxıb. Bu matçların 74-ü Super Liqada baş tutub. Bundan başqa, 21-i avrokuboklarda, 2-si isə TFF Superkuboku və Ziraat Türkiyə Kubokunda olub. Sabah "Trabzonspor"la matçda meydanda olması onun 100-cü oyununa imza atması deməkdir.

Argentinalı ulduz həm də "Qalatasaray"ın tarixində bütün zamanların aparıcı əcnəbi qolçusu olmağı qarşısına məqsəd qoyub. İkardi klubda çıxdığı 99 rəsmi oyunda 67 qol vurmağa nail olub. Lakin o, hələ də Rumıniya əfsanəsi Qeorqe Haginin rekordunu keçməyə çalışır. Hagi “Qalatasaray” heyətində 72 qol vurub. İkardi daha 6 qol vursa, Haginin göstəricisini üstələyəcək. Beləliklə, o, "Qalatasaray" tarixində ən çox qol vuran əcnəbi futbolçu adını qazanacaq.