İstanbulda saxlanılan Hacıbəylidən xəbər var

Milli Şuranın üzvü Gültəkin Hacıbəyli hazırda Türkiyənin İstanbul şəhərində, Arnavutköy Geri Göndərmə Mərkəzində saxlanılır. Bu hadisə Azərbaycanda aparılan Ramiz Mehdiyev işi çərçivəsində onun istintaqa dəvət olunmasından sonra gündəmə gəlib. G. Hacıbəyli verdiyi açıqlamada, noyabrın 29-da gecə saatlarında dörd polis əməkdaşının onu heç bir hüquqi əsası olmadan kirayə qaldığı evdən zorla mərkəzə gətirdiyini bildirir. O xatırladır ki, sentyabr ayının 25-də Türkiyədə təhsil alan oğlunun yanına gəlib və burada qalmaq üçün nəzərdə tutulan 3 aylıq müddət hələ bitməyib. Bundan əlavə, siyasətçinin Türkiyədə qalmaq üçün iki illik oturum icazəsi var. O, bu müddət ərzində heç bir qayda pozuntusuna yol vermədiyini iddia edir.

Gültəkin Hacıbəyli hazırda ona "xarici terrorçulara tətbiq olunan G-82 maddəsi ilə" nəzarət tətbiq olunduğunu deyir. Bu G-82 maddəsi adətən "ictimai təhlükəsizliyə təhdid yaradan şəxslərə" qarşı istifadə olunur və Türkiyədən deportasiyanı nəzərdə tutur. O güman edir ki, hazırda onun Azərbaycana təhvil verilməsi üçün hazırlıq işləri gedir. Buna görə də təcili qaydada Avropa Məhkəməsinə müraciət edilib. Eyni zamanda, vəkili vasitəsilə ən qısa zamanda Türkiyədə məhkəməyə də müraciət ediləcək. Hacıbəyli bildirir ki, onun siyasi fəaliyyətində hər zaman Azərbaycan-Türkiyə dostluğunu və qardaşlığını təbliğ etmək xüsusi yer tutub. O, buna görə də Türkiyə hakimiyyətinin belə bir addım atacağına heç cür inanmaq istəmir.

Hacıbəylinin bu bəyanatları ilə yanaşı, media orqanları onun Bakıdan getməsinin zamanlamasına diqqət çəkirlər. Analitiklərin fikrincə, əgər onun narahatlığı olmasaydı, Ramiz Mehdiyev ev dustaqlığına məhkum edildiyi günün ertəsi Bakıdan çıxıb getməzdi. Bu, Mehdiyev işinin açıq şəkildə genişlənməyə başladığı vaxta təsadüf edirdi. Onun heç bir səbəb olmadan iki ay Türkiyədə qalması və intizamsız hərəkət etməsi suallar doğurur. Bu vəziyyət, onun Azərbaycana dönməkdən kəskin şəkildə yayınmasının arxasında hər hansı hüquqi məsuliyyət doğuran səbəblərin olub-olmaması sualını gündəmə gətirir. Ramiz Mehdiyev işi ilə bağlı istintaqda həm siyasi müxalifətlə, həm də keçmiş yüksək çinli şəxslərlə bağlı müəyyən əlaqələrin araşdırıldığı bildirilir. Onun Türkiyədə saxlanılması və Azərbaycana təhvil verilməsi ehtimalı hazırda cəmiyyətdə ciddi müzakirə mövzusu olaraq qalır.