Laçında söküntü işlərinə start verildi

Laçın rayonunun Qorçu qəsəbəsində genişmiqyaslı bərpa işlərinin ilkin mərhələsi çərçivəsində söküntü işlərinə başlanılıb. Laçın rayonunda Bərpa, Tikinti və İdarəetmə Xidmətinin icraçı direktoru Rafiq Salmanov bu barədə məlumat verib.

O qeyd edib ki, ərazidə ümumilikdə 319 yararsız tikilinin sökülməsi nəzərdə tutulur. Bu işlər “EL SEYM” şirkəti tərəfindən 300 hektar sahədə aparılır və iki ay ərzində tamamlanması planlaşdırılır. Bu, qəsəbənin sıfırdan qurulması üçün zəruri hazırlıq işləridir. Söküntü prosesi başa çatdıqdan sonra Qorçuda nəzərdə tutulan genişmiqyaslı tikinti layihələrinə start veriləcək. Söküləcək binalar əsasən yaşayış üçün yararsız vəziyyətdə olan köhnə tikililərdir.

Söküntülər bitdikdən sonra, 2026-cı ildə Qorçu qəsəbəsində birinci mərhələyə aid tikinti işlərinə başlanılması gözlənilir. Bu mərhələdə tikiləcək 250 fərdi yaşayış evinin layihə-smeta sənədləri artıq hazırlanıb. Fərdi evlərlə yanaşı, Qorçu sosial infrastruktur obyektləri ilə də təmin ediləcək. Buraya 264 yerlik məktəb, 140 yerlik bağça, tibb məntəqəsi, klub-icma mərkəzi, idman-sağlamlıq mərkəzi və inzibati bina daxildir. Həmçinin, qəsəbədə yeni yollar salınacaq. Bu birinci mərhələnin tikintisi Qorçu qəsəbəsinin ilkin sakinləri üçün tam təminatlı yaşayış şəraiti yaratmağı hədəfləyir.

Qorçu qəsəbəsinin inşasının növbəti mərhələsi "Böyük Qayıdış"a dair II Dövlət Proqramı çərçivəsində həyata keçiriləcək. Bu ikinci mərhələ üzrə tikinti işləri 2027-ci ildən 2030-cu ilədək davam edəcək. İkinci mərhələdə daha 250-300 fərdi yaşayış evinin və əlavə olaraq üç-dörd mərtəbəli çoxmənzilli yaşayış binalarının tikintisi planlaşdırılır. Ümumi hədəf Qorçu qəsəbəsində gələcəkdə min ailənin daimi məskunlaşdırılmasıdır. Qəsəbə Laçın Beynəlxalq Hava Limanının yaxınlığında yerləşir. Bu coğrafi mövqe, qəsəbədə məskunlaşan əhalinin gələcəkdə işlə təmin olunması üçün mühüm imkanlar yaradacaq.