Misir İsrail və HƏMAS-ı atəşkəsə əməl etməyə çağırdı

Misir İsrail və HƏMAS-ı Qəzza zolağında əldə olunan atəşkəs razılaşmasına tam əməl etməyə çağırdı. Bu barədə Misir Xarici İşlər Nazirliyi rəsmi bəyanat yaydı.

Xarici İşlər naziri Bədr Abdulati bu məqsədlə fransalı həmkarı Jan-Noel Barrot və danimarkalı həmkarı Lars Lokke Rasmussen ilə telefon danışığı apardı. Abdulati qeyd etdi ki, Misirdə imzalanmış bu atəşkəs razılaşmasına tərəflərin əməl etməsi olduqca vacibdir. Nazir bildirib ki, razılaşmaya riayət etmək hücumlara birdəfəlik son qoyulması istiqamətində atılan əsas addımdır. O, həmçinin Qəzza zolağına humanitar yardımların maneəsiz və tam şəkildə çatdırılmasının vacibliyini xüsusi vurğulayıb.

Lakin məlumata görə, atəşkəs qüvvədə olsa da, zorakılıq davam edib. İsrail əsgərləri Qəzzanın şərqində və şimalında hücumlar həyata keçirib. Nəticədə daha iki fələstinli həlak olub.