Növbəti nəsil daha çox ali təhsilli olacaq - Nazir

Elm və təhsil naziri Emin Əmrullayev cəmiyyətdə qızların və qadınların mövqeyinin möhkəmlənməsində təhsilin rolunu vurğulayıb. Nazir "Hənifə Məlikova-Zərdabi adına təqaüd proqramı 2025" adlı tədbirdə çıxış edərkən, təhsilin qadınların müstəqil və layiqli qərarlar verməsi üçün olduqca vacib olduğunu bildirib. O qeyd edib ki, təhsil sisteminin funksionallığına qadınların rolu ciddi təsir edir.

Xüsusilə təhsilli anaların uşaqların oxu və riyazi bacarıqlarının inkişafında böyük rolu var. Nazirin sözlərinə görə, qızların təhsili istənilən cəmiyyətin inkişafına birbaşa təsir göstərir. Hazırda biz hələ bu yolun başlanğıcındayıq. Görüləsi çox uzun bir yol var. Hələ də məktəblərdə və ali təhsil mərkəzlərində etməli olduğumuz işlər mövcuddur. Biz qız uşaqlarına qarşı məhdudlaşdırıcı davranışları dəstəkləyici davranışlarla əvəz etməliyik. Təhsil almaq insanın inkişafına həmişə müsbət dəyər qatır.

Nazir IV sinif üzrə statistikalara diqqət çəkib. Bu yaşda qızların təhsil göstəriciləri oğlanlara nisbətən daha yüksək olur. Lakin sonrakı illərdə oğlanların nəticələri yüksəlməyə başlayır. Bəzi hallarda bu fərq bioloji amillərlə izah edilsə də, əsas səbəb qızların 9-11-ci sinfə çatdıqda müəyyən ciddi məhdudiyyətlər və qadağalarla üzləşməsidir. Ümumilikdə, ölkədə gənclərin 80-90 faizinə ali, orta ixtisas, yaxud peşə təhsili vermək imkanı var. Bu qrupda qızların da sayı artır.

Bu onu göstərir ki, növbəti nəsil daha çox ali təhsil almış gənclərdən ibarət olacaq. Təxminən 10 il sonra biz həqiqətən də daha çox nəticəni görmüş olacağıq. Təhsildəki uzunmüddətli dəyişiklik dedikdə, nazir məhz bu kütləvi təhsil artımını nəzərdə tutur.