Nurullah Siracov vəfat etdi -FOTO

AZAL-ın Qazaxıstanın Aktau limanı yaxınlığında qəzaya uğrayan təyyarəsində yaralanan Zaqatala sakini Nurullah Siracov vəfat edib. Nurullah Siracov bu gün səhər saatlarında yaşadığı evdə dünyasını dəyişib. Onun ölümü ölkədə geniş rezonans doğuran və 2024-cü il dekabrın 25-də baş vermiş faciəvi hadisə ilə birbaşa əlaqələnirdi.

Mərhum qəza baş verən gün həyat yoldaşı ilə birgə Qroznıda yaşayan oğlunun yanına gedirmiş. Onların səfərinin əsas məqsədi Nurullah Siracovun müalicəsi idi. O, uzun müddətdir ki, xərçəng xəstəliyindən əziyyət çəkirdi və AZAL təyyarəsi ilə Qroznıya məhz bu xəstəliklə bağlı əməliyyat olunmaq üçün yola çıxmışdı. Təəssüf ki, qəza baş verərkən həm o, həm də həyat yoldaşı xəsarətlər alaraq dərhal xəstəxanaya yerləşdirilmişdilər. Bu hadisə səbəbindən Nurullah Siracov əməliyyat oluna bilmədi və müalicəsi yarımçıq qaldı.

O, təyyarə qəzasında aldığı xəsarətlərdən sağalsa da, Bakıdakı xəstəxanada müalicəsini başa vurduqdan sonra evinə buraxılmışdı. Ancaq xəsarətlərinə qalib gəlməsinə baxmayaraq, əməliyyatın təxirə düşməsi və xərçəng xəstəliyinin irəliləməsi onun həyatını xilas etməyə imkan vermədi. Nurullah Siracovun xərçəng xəstəliyinə qalib gəlməsi mümkün olmadı və nəticədə bu gün səhər saatlarında dünyasını dəyişdi.