Prezidentin vəzifə verdiyi Səfərov kimdir? - DOSYE

Prezident İlham Əliyevin Sərəncamı ilə Sərdar Süleyman oğlu Səfərov Strateji Obyektlərin Mühafizəsi Dövlət Agentliyinin rəisi təyin edilib. Bu təyinata paralel, dövlət başçısının digər sərəncamı ilə ona “general-mayor” ali hərbi rütbəsi verilib. Bu yüksək vəzifəyə gətirilən Sərdar Səfərov 1973-cü ildə Sumqayıt şəhərində anadan olub. O, ilk hərbi təhsilini 1999-cu ildə Türkiyənin Jandarma Zabitlər Məktəbində alıb. Daha sonra 2020-ci ildə isə Daxili İşlər Nazirliyinin Polis Akademiyasını bitirərək peşəkar biliyini təkmilləşdirib.

Səfərovun karyerası daxili işlər orqanlarında xidmətlə zəngindir. O, 2019-2022-ci illərdə Bakı Şəhər Baş Polis İdarəsinin İctimai Təhlükəsizlik İdarəsinin rəis müavini və daha sonra həmin İdarənin rəisi vəzifələrində çalışıb. 2023-cü ilin yanvarında o, daha yüksək pilləyə qalxaraq Daxili İşlər Nazirliyinin Baş İctimai Təhlükəsizlik İdarəsinin rəisi təyin olundu. Eyni ildə Sərdar Səfərov polis general-mayoru kimi Xankəndi şəhərinin komendantı vəzifəsini icra edib. Prezident Xankəndiyə səfər edərkən məhz onun raport verdiyi də qeyd edilir.

Xidməti vəzifələrini yerinə yetirərkən göstərdiyi yüksək peşəkarlıq Səfərovun dövlət tərəfindən mükafatlandırılması ilə təsdiqlənib. Azərbaycan dövlətçiliyinin qorunmasında və ictimai təhlükəsizliyin təmin olunmasında fərqləndiyinə görə o, “Hərbi xidmətlərə görə”, “İgidliyə görə” və “Vətən uğrunda” medalları ilə təltif edilib. Sərdar Səfərov ailəlidir, onun üç övladı var.