Putin nüvə silahı ilə bağlı təlimat verdi

Rusiya Prezidenti Vladimir Putin Təhlükəsizlik Şurasının üzvlərinə nüvə sınaqları üçün lazımi hazırlıqların görülməsi barədə tapşırıq verib. Bu barədə Kremlin yaydığı açıqlamada deyilir. Putin Şuranın üzvləri ilə görüş keçirdi. Görüşdə Rusiya müdafiə naziri Andrey Belousov, Baş Qərargah rəisi Valeri Gerasimov, Xarici Kəşfiyyat Xidmətinin rəisi Sergey Narışkin, Təhlükəsizlik Şurasının katibi Sergey Şoyqu və Federal Təhlükəsizlik Xidmətinin direktoru Aleksandr Bortnikov iştirak ediblər. Məlumatlara görə, görüşün əvvəlində ABŞ-nin nüvə sınaqlarına başlamaq planları müzakirə edilib.

Putin mövzu ilə bağlı çıxış edərkən Rusiyanın Hərtərəfli Nüvə Sınaqlarının Qadağan Edilməsi Müqaviləsinə sadiq qaldığını və ondan çıxmaq planının olmadığını bildirib. Lakin o, 2023-cü ildə Federal Məclisə etdiyi müraciəti xatırladıb. O zaman Putin demişdi ki, əgər ABŞ və ya digər müqavilə tərəfləri nüvə sınaqları keçirsə, Rusiya cavab verməyə məcbur olacaq. Rusiya rəhbəri bu səbəbdən cavab tədbirlərinə hazır olmağı vacib sayır, çünki Vaşinqtonun sınaqlara başlaması barədə danışıqlar aparılırdı.

Bu kontekstdə Putin dövlət qurumlarına bir sıra tapşırıqlar verib. O, Xarici İşlər Nazirliyinə, Müdafiə Nazirliyinə, kəşfiyyat xidmətlərinə və müvafiq mülki qurumlara bu məsələ ilə bağlı əlavə məlumat toplamağı tapşırıb. Həmçinin, bu qurumlar Təhlükəsizlik Şurası səviyyəsində lazımi təhlillər aparmalıdırlar. Ən əsası, onlardan nüvə silahı sınaqlarına hazırlıq işlərinə başlamaq üçün rəsmi təkliflər təqdim etmələri tələb olunur. Bu addım Rusiyanın ABŞ-nin mümkün sınaqlarına qarşı strateji hazırlığını göstərir.