Qalmaqallı görüntülərdən sonra Səmədovun 3-cü oğlu da işdən çıxarıldı

İmişli Rayon Ağsaqqallar Şurasının həbs edilmiş sabiq sədri Saleh Səmədovun üçüncü oğlu Mehralı Səmədov da işindən azad edilib. Müvafiq əmr imzalanıb. Bu addım atanın qalmaqallı çıxışından sonra başlanan geniş miqyaslı təmizləmə əməliyyatının davamı hesab edilir. Saleh Səmədovun ictimai çıxışı və ardınca mənimsəmə ittihamı ilə həbsi ailə üzvlərinin dövlət qurumlarındakı vəzifələrinə təsir edib.

Mehralı Səmədov, işdən çıxarılana qədər, Strateji Obyektlərin Mühafizəsi Dövlət Agentliyində şöbə rəisi idi. Onun qardaşları da daha əvvəl vəzifələrindən uzaqlaşdırılıb. Qardaşlardan biri Penitensiar Xidmətinin 3 saylı məntəqə tipli cəzaçəkmə müəssisəsinin rəisi olub. Digəri isə İmişli Rayon İcra Hakimiyyəti başçısının Yeni Bəhramtəpə İnzibati Ərazi Dairəsi üzrə nümayəndəsinin müavini vəzifəsini tuturdu. Beləliklə, Saleh Səmədovun hər üç oğlu dövlət strukturlarındakı postlarını itirmiş oldu.

Bu hadisələr zənciri yüksək rütbəli məmurlara da təsir göstərdi. Bir neçə gün əvvəl Strateji Obyektlərin Mühafizəsi Dövlət Agentliyinin rəisi, general-mayor İlqar Abbasov da vəzifəsindən azad edildi. Aparılan araşdırma zamanı generalın Saleh Səmədovla əlaqələrinin olduğu ortaya çıxdı. Hətta general Abbasov qurumun yaradılmasının 30 illiyinə həsr edilmiş medalla Səmədovu təltif etmişdi, bu da onların əlaqəsini təsdiqləyən detallardan biri oldu.

Qeyd edək ki, qalmaqal Saleh Səmədovun Faşizm üzərində Qələbə Günü (9 May) tədbirindəki çıxışından sonra başlamışdı. O, SSRİ bayrağı altında və sinəsində rus imperiyasının rəmzi sayılan “Georgi lenti” ilə görünmüşdü. Daha sonra Dövlət Təhlükəsizliyi Xidməti (DTX) onu mənimsəmə ittihamı ilə həbs etdi. Hazırda bu iş üzrə ilkin istintaq prosesi davam edir.