"Qarabağ" - "Çelsi" oyunu ilə bağlı əməliyyat keçirildi

Daxili İşlər Nazirliyinin Kibercinayətkarlıqla Mübarizə Baş İdarəsi "Qarabağ" - "Çelsi" futbol oyunu biletlərinin qeyri-qanuni satışına qarşı əməliyyat keçirib. Noyabrın 5-də Tofiq Bəhramov adına stadionda keçiriləcək Çempionlar Liqası matçının biletlərini onlayn qaydada qanunsuz satmağa çalışan bir qrup şəxs müəyyən edilib.

Kiberpolis tərəfindən saxlanılanlar arasında Emil Dadaşov, Cavid Dadaşov, Rəşad Həsənov, Murad Mirkişiyev və Vüsal Zalov var. Bu şəxslər biletləri əvvəlcədən onlayn və rəsmi satış məntəqələrindən əldə ediblər. Daha sonra onlar sosial şəbəkələrdəki müxtəlif səhifələrdə və "qara bazar"da biletləri dəyərindən daha artıq qiymətə satmağa cəhd ediblər.

Araşdırmalar zamanı müəyyən edilib ki, həmin şəxslər biletlərin məhdud sayda olmasından və oyuna vətəndaşların göstərdikləri böyük maraqdan sui-istifadə ediblər. Onlar bu vəziyyətdən istifadə edərək qanunazidd əməllər törədiblər. Hüquq mühafizə orqanları tərəfindən saxlanılan şəxslər barəsində qanuna uyğun tədbirlər görülür. Əməliyyatlar davam edir.

Daxili İşlər Nazirliyi ölkəmizdə keçirilməsi nəzərdə tutulan beynəlxalq əhəmiyyətli idman turnirlərini canlı izləmək istəyən vətəndaşlara bir daha müraciət edir. Nazirlik biletləri yalnız rəsmi satış nöqtələrindən əldə etməyi tövsiyə edir. Bildirilib ki, sosial şəbəkələrdə və digər qeyri-qanuni mənbələrdən bilet alan şəxslər dələduzluq halları ilə üzləşə bilərlər.