Rafiq Mehdiyev vəfat etdi - FOTO

Daxili Yanmaq Mühərrikləri üzrə dünya şöhrətli azərbaycanlı alim, professor Rafiq Mehdiyev bugün səhər saatlarında vəfat edib.

Alim 89 yaşında dünyasını dəyişib.

Rafiq Mehdiyev 1936-cı ildə Cəbrayılda anadan olmuşdu. O, 1993-2000-ci illərdə Azərbaycan Texniki Universitetinin rektoru vəzifəsində çalışıb. Daha sonra, 2000-2020-ci illərdə İstanbul Texniki Universitetində işləmiş, Türkiyədə öz işlərini və ixtiralarını davam etdirmişdi.

Professor Mehdiyev Türkiyənin ilk yerli traktor motorunu ixtira edən şəxs idi. O, 300-dən çox elmi əsərin və 15-ə yaxın ixtiranın müəllifidir. Alimin son ixtiralarından biri maye qazla işləyən dizel mühərrikidir; bu ixtira Türkiyədə böyük müvəffəqiyyət qazandı. Türkiyədə işlədiyi müddətdə Rafiq Mehdiyev müdafiə sənayesi quruculuğunda yaxından iştirak etmişdi.

Alimin bir sıra ixtiraları fərqli qərb dövlətlərində - İngiltərə, İtaliya, Almaniya, eləcə də Rusiya və Yaponiyada patent alıb. O, 20-dən çox alim yetişdirib; onların arasında ABŞ, Almaniya, Hindistan, İraq, Polşa və Ukrayna vətəndaşları da var.