"Ramiz Mehdiyev AMEA-dan xaric edilməlidir" -Etibar Əliyev

Sabiq deputat Etibar Əliyev Ramiz Mehdiyevin Azərbaycan Milli Elmlər Akademiyasının (AMEA) həqiqi üzvlüyündən çıxarılmasını tələb edir. Əliyev bu çağırışı sosial şəbəkə hesabında edib və tələbini Mehdiyevin üzərinə düşən ağır cinayət ittihamları ilə əsaslandırıb. O bildirib ki, AMEA Nizamnaməsinin 6, 7, 15, 21 və 25-ci maddələri bu məsələnin həllinə imkan verir.

Ramiz Mehdiyev hal-hazırda Cinayət Məcəlləsinin bir sıra ciddi maddələri ilə ittiham olunur. Bu maddələrə 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) daxildir. Akademikin barəsində 4 ay müddətinə ev dustaqlığı qətimkan tədbiri seçilib. Etibar Əliyev, AMEA-nın cinayətlərdə ittiham olunan şəxslərə qarşı mövqeyini göstərmək üçün keçmişdəki bir hadisəni xatırlatdı. O, 2005-ci ildə həbs olunan sabiq səhiyyə naziri Əli İnsanovun 2007-ci ildə AMEA həqiqi üzvlüyündən necə xaric edildiyini misal gətirdi. Əliyev belə hallarda “akademik” adının müdafiə edilməsinin vacib olduğunu vurğulayır.

Əli İnsanovun AMEA-dan çıxarılması məsələsi 2007-ci il mayın 4-də keçirilmiş AMEA-nın ümumi yığıncağında müzakirə edilmişdi. Həmin tədbirdə 60 həqiqi üzvdən 52-si və 95 müxbir üzvdən 71-i iştirak edirdi. İclasda Biologiya elmləri bölməsinin akademik-katibi Əhliman Əmiraslanov gizli səsvermə nəticəsində bölmənin bütün 13 akademiki tərəfindən İnsanovun sıralardan xaric edilməsinə səs verildiyini bildirmişdi. Bölmə yığıncağı AMEA Nizamnaməsinin müvafiq maddələrini nəzərə alaraq, İnsanovun həqiqi üzvlükdən xaric edilməsi haqqında qərar qəbul etmişdi.

Akademiklər o zaman vəziyyəti kəskin tənqid etmişdilər. Akademik Fuad Qasımzadə bu vəziyyəti xəcalətverici adlandırmış, akademik Böyükkişi Ağayev isə Akademiyanın Azərbaycan elminin zirvəsində duran bir qurum olduğunu və layiq olmayan şəxsin orada qala bilməyəcəyini demişdi. Akademik Budaq Budaqov "Akademik" adının həbsxanadan xilas edilməli olduğunu vurğulamışdı. Səsvermənin yekununda Hesablama Komissiyasının sədri Vasim Məmmədəliyev 57 akademikdən 56-sının İnsanovun xaric edilməsinin lehinə səs verdiyini elan etmişdi. Beləliklə, Əli İnsanov AMEA-nın həqiqi üzvlüyündən xaric edildi. Etibar Əliyev bu tarixi presedenti əsas gətirərək, Ramiz Mehdiyev üçün də analoji iclasın keçirilməsinin tamamilə mümkün olduğunu qeyd edir.