​“Soyuq müharibə”nin ayaq səsləri - Nüvə gərginliyi artır

Soyuq müharibə dövrünü xatırladan nüvə gərginliyi Rusiyanın yeni silah sınaqları ilə daha yüksək səviyyəyə qalxıb.

Rusiya Prezidenti Vladimir Putinin bəzi silah sistemləri ilə bağlı açıqlaması qlobal miqyasda gərginliyi xeyli artırıb. Bu silahlar arasında “Poseidon” nüvə torpedası və “Burevestnik” nüvə enerjisi ilə işləyən raket sınaqları var. Bu yeni nəsil silah sistemlərinin sınaqları nüvə gücləri arasındakı rəqabəti yenidən ön plana çıxarır.

Vladimir Putin nüvə enerji blokuna malik “Poseidon” torpedasının uğurla sınaqdan keçirildiyini açıqlayıb. Qeyd olunur ki, torpeda həm sualtı qayıq mühərriki, həm də nüvə bloku ilə sınaqdan keçirilib. Bu addımlar beynəlxalq münasibətlərdəki həssaslığı artırır və qlobal siyasətdəki köhnə rəqabət tendensiyalarını geri qaytarır.

Gərginlikdə təkcə Rusiya deyil, digər böyük dövlətlərin də rolu var. Məlumatlara görə, ABŞ Prezidenti Donald Tramp 1992-ci ildən bəri qüvvədə olan nüvə sınaqlarına dair öhdəliyi faktiki olaraq yekunlaşdırıb. Mütəxəssislər bu vəziyyəti Soyuq müharibədən bəri yaşanan ən yüksək nüvə rəqabəti kimi qiymətləndirirlər. Eyni zamanda, Çinin genişlənən nüvə proqramı da bu qlobal nüvə gərginliyində üçüncü vacib element kimi önə çıxır.