Turistlərin Türkiyəyə marağı niyə azalır?

Xarici turizm platformalarında verilən bir sual son vaxtlar diqqət çəkir: "Bir daha əsla səfər etməyəcəyiniz ölkə hansıdır?" Təəssüflər olsun ki, cavablar arasında Türkiyənin adı tez-tez hallanır. Hətta bəzi istifadəçilər bu ölkəni "Avropanın Hindistanı" adlandırır. Bəs niyə turistlər Türkiyəyə getmək istəmir? Turizm eksperti Ceyhun Aşurov bu vəziyyəti izah edib.

Aşurovun sözlərinə görə, Türkiyə əslində pandemiyadan sonra turizm bazarını ən tez bərpa edən ölkələrdən biridir və kifayət qədər turist qəbul etməyə davam edir. Rəqəmlər turizm gəlirlərinin sürətlə artdığını göstərir. Pandemiyadan əvvəl də Türkiyə ən çox turist qəbul edən ilk 10 ölkə sırasında yer alırdı. Son iki-üç ilin statistikası həm turizm gəlirlərinin, həm də gələn turistlərin sayının pandemiyaqədərki səviyyəni üstələdiyini göstərir. Hazırda Türkiyənin turizmdən əldə etdiyi gəlirin təxminən 60 milyard dollara, qəbul etdiyi turist sayının isə 60 milyona yaxınlaşdığı bildirilir. Bütün bunlar Türkiyə turizminin güclü mövqeyini qoruduğunu göstərir.

Bununla belə, bəzi bazarlarda turistlərin marağında gözlənilən azalma müşahidə olunur. Ekspert C. Aşurov bu vəziyyətin əsas səbəbini qiymətlərin yüksəlməsi ilə əlaqələndirir. Ölkədə qidalanma və otel xərcləri, minimum əmək haqqı və yüksək inflyasiya fonunda qiymətlər dollar bazasında belə artır. Təyyarə biletləri nisbətən əlverişli qalsa da, bu artım tur paketlərinin qiymətlərini təxminən 50%-ə qədər bahalaşdırıb. Nəticədə, qiymətlərin yüksəlməsi səbəbindən Azərbaycan bazarından Türkiyəyə gedən turistlərin sayında 30%-ə yaxın azalma qeydə alınıb. Bu, xüsusilə qiymət həssaslığı olan bazarlarda tur paketlərinin bahalaşmasının ciddi təsir göstərdiyini bildirir.

Mövcud problemlərə baxmayaraq, Türkiyə turizm bazarını aktiv şəkildə çeşidləndirməyə çalışır. Pandemiya dövründə digər ölkələr məhdudiyyətlər tətbiq edərkən, Türkiyənin sərhədləri daha tez açması və baryerləri qaldırması böyük bir turist axınına yol açdı. Bu siyasət hələ də davam edir. Vizaların sadələşdirilməsi və Türk Hava Yollarının liberal addımları kimi amillər Türkiyəyə turist gəlişini artırmaqda davam edən faktorlardır. Bu addımlar qiymət artımının yaratdığı neqativ təsirləri tarazlamağa yönəlib.