Türkiyədə 12 deputatın toxunulmazlığı ləğv edilir

Türkiyə siyasətinin mərkəzində yer alan bir neçə tanınmış fiquru çətin günlər gözləyir. İqtidar və müxalifət arasındakı gərgin siyasi çəkişmə 12 deputatın mandatını itirməsinə səbəb ola bilər. Bu siyahıda ana müxalifət partiyasının lideri Özgür Özəl, onun müavini Mahir Başarır və İşçi Partiyasının sədri Erkan Baş kimi önəmli şəxslərin adları var.

Hökumət partiyasını təmsil edən millət vəkilləri müxalifətdən olan deputatları Prezident Rəcəb Teyyub Ərdoğanı təhqir etməkdə ittiham edirlər. Bu iddialara əsaslanaraq, AKP-li parlamentarilər qeyd olunan 12 deputatın toxunulmazlığının ləğv edilməsi üçün rəsmi müraciət ediblər. Müraciət Türkiyə Böyük Millət Məclisinin İntizam Komissiyasına göndərilib.

Toxunulmazlığın qaldırılması tələbi müxalifət liderləri üçün ciddi təhlükə yaradır. Xüsusilə, CXP sədri Özgür Özəllə bağlı vəziyyət daha ağırdır. Yalnız onunla əlaqədar komissiyaya 7 ayrı qovluq təqdim edilib. Bu vəziyyət ölkədə siyasi gərginliyin yüksək səviyyədə olduğunu göstərir.