Ukrayna "Tomaqavk"ların yerinə ABŞ-dən bu silahları istəyir

Ukrayna Rusiyanın hava hücumlarına qarşı ən güclü müdafiə addımını atır. Kiyev əvvəllər tələb etdiyi Tomahawk raketləri yerinə, indi ABŞ-dən “Patriot” hava hücumundan müdafiə sistemləri almağa çalışır. Bu sistemlər ölkənin hava məkanını qorumaq üçün həlledici hesab edilir.

Məlumata görə, Zelenski administrasiyası 25 “Patriot” hava hücumundan müdafiə sistemi tədarük etmək üçün böyük bir müqavilə üzərində işləyir. Bu sistemlərin Ukraynaya çatdırılması ilə bağlı ABŞ-nin razılıq verə biləcəyi irəli sürülüb. Bu planın həyata keçirilməsində yalnız ABŞ deyil, həm də bir çox Avropa ölkələri iştirak edəcək. Kiyev rəsmiləri tədarük tələbini rəsmi şəkildə irəli sürməyə hazırlaşırlar.

Ukrayna Patriot sistemlərini Rusiya tərəfindən buraxılan ballistik raketlərin qarşısını almaq üçün güclü müdafiə vasitəsi sayır. Bu raketlər Ukraynanın əsas şəhərlərinə və kritik infrastrukturlarına ciddi təhlükə yaradır. Odur ki, bu müdafiə sistemlərinin alınması Ukraynanın müharibə strategiyasında vacib bir dönüş sayılır.

Qeyd edək ki, Ukrayna bu addımı atmadan əvvəl ABŞ-dən "Tomaqavk" qanadlı raketlərini tələb etmişdi. Lakin ABŞ tərəfi bu tələbi rədd etdi. Vaşinqtonun rədd cavabı Rusiyanın ciddi etirazlarından sonra verilmişdi. Hazırda Kiyevin hücum silahları əvəzinə müdafiə sistemlərinə üstünlük verməsi, həm də diplomatik gərginliyi azaltmağa yönəlmiş bir addım ola bilər.