Vergi Xidməti 43 Sahibkara Cərimə Tətbiq Etdi

Dövlət Vergi Xidməti Bakıda iaşə və pərakəndə ticarətlə məşğul olan 43 sahibkara maliyyə sanksiyaları tətbiq edib.

Vergi Xidməti bildirir ki, çoxsaylı xəbərdarlıqlara baxmayaraq, bəzi iaşə və ticarət obyektlərində kartla ödənişlər POS-terminal deyil, kartdan-karta köçürmə vasitəsilə aparılır. Bu halların qarşısını almaq üçün nəzarət gücləndirilmiş və nəticədə 43 obyektdə bu cür qeyri-qanuni əməliyyatlar aşkar olunub.

Nəzarət zamanı bəzi obyektlərdə kart nömrələrinin aşkar yerlərdə nümayiş olunduğu, müştərilərə kartdan-karta köçürmə etmək təklif olunduğu müəyyən edilib. Bu halların davam etməsi səbəbindən sahibkarlıq subyektlərinə maliyyə sanksiyaları tətbiq edilib.

Vergi Xidməti xatırladır ki, nağdsız ödənişlər yalnız POS-terminal vasitəsilə aparılmalıdır. POS-terminal qəbzi ilə yanaşı, müştəriyə nəzarət-kassa aparatının çeki də təqdim olunmalıdır. Sahibkarlar maliyyə sanksiyalarından qaçmaq üçün nağdsız ödənişlər zamanı POS-terminallardan istifadəni təmin etməlidirlər.