XİN Avropa Komissarının Bəyanatına Etiraz Etdi

Avropa Parlamentində keçirilən müzakirələr zamanı Avropa Komissarı Nikolas Şmitin Azərbaycan haqqında dedikləri tamamilə qəbuledilməz, əsassız və önyarğılıdır.

Azərbaycan Xarici İşlər Nazirliyinin mətbuat katibi Ayxan Hacızadə, Şmitin Avropa Parlamentindəki danışığında səsləndirdiyi əsassız iddialara qarşı çıxış edərək bildirib ki, Avropa Xarici Fəaliyyət Xidmətinin (AXFX) tərəfindən hazırlanan bu bəyanat Azərbaycanın daxili işlərinə növbəti müdaxilə cəhdidir. Bu bəyanat gerçəkliyi əks etdirmir.

Azərbaycan vətəndaşlarının siyasi görüşlərinə görə cinayət məsuliyyətinə cəlb olunması və jurnalist, insan haqları müdafiəçisi kimi tanınan şəxslərə qarşı açılmış cinayət işlərinin siyasi motivli olması iddiası tamamilə yalandır.

AXFX və Avropa Parlamentinin bu cür mənfi yanaşması artıq öz səmərəsizliyini göstərib və yalnız Azərbaycan-Avropa münasibətlərini gərginləşdirir.

A. Hacızadə qeyd edib ki, Avropa İttifaqı, Ermənistanın Azərbaycana qarşı uzun illər davam edən təcavüzü, bəzi Aİ ölkələrində insan haqları ilə bağlı ciddi problemlər, artan İslamofobiya, ikrah doğuran neokolonial siyasət, siyasi təqiblər nəticəsində həbs olunanların həbsxanalarda və “sarı gödəkçəlilər” aksiyalarında həlak olmaları, Yeni Kaledoniya və digər dənizaşırı ərazilərdə baş verən qanlı aksiyalara laqeyd qalır. Bu halda, Avropa Komissarının Azərbaycanda insan haqları məsələlərindən və Azərbaycan-Ermənistan sülh səylərindən danışmağa mənəvi haqqı yoxdur.

O əlavə edib ki, BMT-nin İqlim Dəyişiklikləri üzrə Çərçivə Konvensiyasının Tərəflər Konfransının 29-cu sessiyasını (COP29) iqlim dəyişikliklərinin cavablandırılması işinə uyğun olmayan siyasi məsələlərlə əlaqələndirmək cəhdləri bəzi Avropa siyasətçilərinin real simasını nümayiş etdirir.

Azərbaycan Xarici İşlər Nazirliyi, Avropa Parlamentini və Aİ-ni, regionda sülh və sabitliyə zidd olan birtərəfli mövqedən əl çəkməyə çağırır.