Zəfər Muzeyinə giriş bu qiymətə olacaq

Bakıda 8 noyabr tarixində açılışı olan Zəfər Muzeyi bu gündən etibarən ziyarətçilərin istifadəsinə verilib. Dövlət başçısı İlham Əliyevin müvafiq tapşırığına əsasən, ziyarətçilər Şanlı Zəfər tarixinin əbədiləşdirildiyi muzeylə tanış olmaq üçün 9-11 noyabr tarixlərində heç bir ödəniş etməyəcəklər. Giriş bu ilk üç gün üçün sərbəstdir.

Muzeyə böyük maraq göstərilməsi və güclü ziyarətçi axını nəzərə alınaraq, hər kəsin rahat keçidini təmin etmək məqsədilə girişdə növbə sistemi yaradılacaq. Noyabrın 12-dən başlayaraq isə muzey bilet sistemi ilə fəaliyyət göstərəcək. Muzey bazar ertəsi istisna olmaqla, digər günlər saat 11:00-dan 18:00-dək açıq olacaq.

Bilet qiymətləri Azərbaycan vətəndaşları üçün fərqli təyin edilib. Məktəb yaşlı uşaqlar muzeyə ödənişsiz daxil ola bilər. Tələbələr üçün giriş 1 AZN, böyüklər üçün isə 5 AZN təşkil edir. Xarici ölkə vətəndaşları üçün qiymətlər daha yüksəkdir: uşaqlar üçün 6 AZN, böyüklər üçün isə 15 AZN müəyyənləşdirilib.

Bəzi vətəndaş qrupları üçün muzeyə giriş tamamilə ödənişsiz olacaq. Şəhid ailələri, müharibə iştirakçıları, hərbi qulluqçular və I, II qrup əlilliyi olan vətəndaşlar Zəfər Muzeyini ziyarət edərkən heç bir bilet haqqı ödəməyəcəklər.