"Avro 2028"də Şok Qərar: İngiltərə İki Oyunu "Uembli"dən Başqa Stadionda Keçirməyə Hazırlaşır

2028-ci il Futbol üzrə Avropa Çempionatının (Avro 2028) ev sahiblərindən biri olan İngiltərə milli komandası, qrup mərhələsinin oyunlarından birini Londonun məşhur "Uembli" stadionundan kənarda keçirmək ehtimalı ilə üz-üzədir. İngiltərə Şotlandiya, Uels və İrlandiya Respublikası ilə birlikdə bu turnirə ev sahibliyi etsə də, komandanın turnirə vəsiqə qazanması tələb olunur.

BBC Sport agentliyinin əldə etdiyi məlumata görə, "Üç Şir" ləqəbli yığma komanda qrupdakı üç oyunundan birini İngiltərədəki digər beş stadiondan birində oynaya bilər. Bu stadionlara Mançester Sitinin "Etihad", "Tottenhem Hotspur", "Villa Park", "Everton"un "Hill Dickinson" və Nyukasldakı "St Jeyms Park" daxildir. Əgər İngiltərə qrupdan çıxarsa, bu, onların "Uembli"dən kənar ikinci matçı ola bilər. Belə ki, turnirin təşkilatçıları "Uembli"də heç bir 1/8 final oyunu keçirməyəcəklər. Bu isə o deməkdir ki, millinin ilk pley-off mərhələsinə keçəcəyi halda, oyun millinin əsas stadionundan uzaqda baş tutacaq. "Times" qəzetinin verdiyi ilkin məlumata görə, turnirin açılış oyunu isə Uelsin paytaxtı Kardiffdəki "Prinsipaliti" stadionunda keçirilməlidir. Avro 2028-in tam cədvəli 12 noyabr tarixində Londonda rəsmi təqdimat mərasimində açıqlanacaq. Qeyd edək ki, İngiltərə Futbol Assosiasiyası (FA) və Avropanın idarəedici orqanı UEFA bu məsələ ilə bağlı şərh verməkdən imtina edib.

UEFA-nın qərarına əsasən, İngiltərə, Şotlandiya, Uels və İrlandiya Respublikası Avro 2028-ə vəsiqə qazanmalıdırlar. Lakin, əgər bu ev sahibi ölkələrdən hər hansı biri turnirə çıxa bilməsə, finallarda iki yer onlara ehtiyatda saxlanılacaq. Tarixi təcrübəyə baxsaq, İngiltərə "Avro 1996"da bütün oyunlarını "Uembli"də keçirmişdi. "Avro 2020" isə bir neçə ölkə arasında bölünmüşdü və o zaman da İngiltərə yalnız Ukrayna ilə Romada keçirilən dörddəbir final istisna olmaqla, bütün matçlarını "Uembli"də oynamışdı. Turnirdə digər oyunlara Dublinin "Aviva" və Qlazqoun "Hempden Park" stadionları da ev sahibliyi edəcək. Şimali İrlandiya isə maliyyə məsələləri səbəbindən Belfastdakı "Kaysment Park" variantının ləğvindən sonra turnirə ev sahibliyi edəcək ölkələr siyahısından çıxarılıb.