Millinin sabiq futbolçusu baş hakimi xəstəxanalıq etdi - VİDEO

Rusiyanın paytaxtı Moskvada keçirilən həvəskar futbol komandaları arasında “Selebriti Kuboku” turnirində baş hakim xəstəxanalıq olub.

“Amkal” futbol klubunun təşkil etdiyi turnirdə “Matç TV” və “Niçeqo Obıçnoqo” komandaları qarşılaşıb.

“Matç TV”nin heyətində Rusiya millisinin sabiq futbolçuları – Andrey Tixonov və Roman Şirokov kimi veteranlar oynayıb. Epizodlardan birində Şirokov penalti nöqtəsində yıxılsa da, hakim oyunu davam etdirib. Üstəlik, baş hakim Nikita Dançenko Romana birbaşa qırmızı vərəqə göstərib (böyük ehtimalla, söyüşə görə).

Bundan sonra 39 yaşlı Roman Şirokov hakimi bir zərbə ilə xəstəxanalıq edib. Oyun dayandırılıb, hakim xəstəxanaya aparılıb.

Zərərçəkmiş dörd saatdan çox xəstəxanada müalicə aldığını və Şirokovdan polisə şikayət edəcəyini bildirib.

Roman Şirokov isə “Instagram” hesabında Nikita Dançenkodan və turnirin təşkilatçılarından üzr istəyib.