ABŞ-da Hökumət Böhranı: Hava Məkanı Bağlana Bilər - Uçuş Təhlükəsizliyi Təhdid Altında

Amerika Birləşmiş Ştatlarında federal hökumətin fəaliyyətinin dayandırılması (shutdown) ölkənin aviasiya sektorunda ciddi aksamalara səbəb olub. Bu, ABŞ tarixindəki ən böyük idarəetmə böhranlarından biri kimi qiymətləndirilir. Hava hərəkətinə nəzarət edən əməkdaşların böyük bir hissəsinin işə çıxa bilməməsi nəticəsində hava məkanında həddindən artıq sıxlıq yaranıb və bu vəziyyət uçuşların təhlükəsizliyini birbaşa təhdid edir.

Nəqliyyat nazirliyi rəsmiləri ciddi xəbərdarlıq ediblər. Əgər hökumət böhranı gələn həftəyə qədər öz həllini tapmasa, bəzi ərazilərdə ABŞ hava məkanı müvəqqəti olaraq bağlanmalı ola bilər. Müdafiə naziri Şon Daffi bu riskin səbəbini kifayət qədər hava hərəkəti nəzarətçisinin işdə olmaması ilə izah edib. Radar görüntülərinə görə, minlərlə təyyarə ABŞ hava məkanında dairələr cızmaq məcburiyyətində qalır ki, bu da yaranmış xaosun miqyasını göstərir.

Ölkədə hava hərəkəti nəzarətçilərinin əhəmiyyətli bir hissəsi, yəni təxminən 80 faizi, keçən cümə günü işə gəlməyib. Təxminən 13 min dövlət işçisi maaş almadan öz vəzifələrini icra etməyə məcbur olsa da, bəziləri bu vəziyyətə dözməyərək işi tamamilə tərk edib. Əmək haqqı almayan ictimai işçilərin tətillərə başlaması səbəbindən aviasiya sektoru böhrandan ən çox zərər çəkən sahə olaraq qalır.

Federal hökumətin bağlanması oktyabrın 1-dən bəri davam edir. Bu vəziyyət Respublikaçılar və Demokratlar arasında büdcə razılaşmasının əldə edilməməsi nəticəsində yaranıb. Konqres yeni maliyyə ili başlamazdan əvvəl müvəqqəti büdcə layihəsini təsdiq edə bilmədiyi üçün ölkə faktiki olaraq "bağlanma" prosesinə daxil olub. Qanunvericiliyə görə, büdcə təsdiqlənmədiyi müddətdə federal hökumət xərcləmə səlahiyyətini itirir və "əsas" sayılmayan xidmətlərin fəaliyyəti dayandırılır.

Müəyyən xidmətlər, o cümlədən ordu, kəşfiyyat qurumları, dövlət xəstəxanaları, hava limanları və həbsxanalar fəaliyyətə davam edir. Lakin bu qurumlarda çalışan heyət yeni büdcə qanunu qəbul edilənə qədər maaşlarını ala bilməyəcək. Bu maliyyə qeyri-müəyyənliyi əməkdaşların işə davam etməkdən imtina etməsi riskini artırır, bu da ilk növbədə hava nəqliyyatının işinə mənfi təsir göstərir.