ABŞ yenidən Suriyadakı terrorçuları dəstəkləyir

ABŞ Müdafiə Naziri Lloyd James Austin ötən günlərdə Suriyada fəaliyyət göstərən PKK/YPG-nin Suriyadakı qolu olan SDG ilə "yaxşı əlaqələrimiz var və bunun davam edəcəyini düşünürəm" deyə bəyan edib. Pentagon bu gün də açıqlama yayaraq Suriyadakı terrorçuları dəstəklədiyini və Türkiyənin SDG-yə qarşı hücumlarına bir daha dözməyəcəyini bildirib.

Suriya xalqına kömək edəcəklərini hər fürsətdə bəyan edən ABŞ, Fıratın şərqində yerləşən PKK/YPG-ni dəstəkləməkdə davam edir. Dünən axşam Türkiyə Əsəd rejimindən qalmış silah və avadanlıqları oğurlamağa çalışan terrorçulara əməliyyat keçirib.

Əməliyyatdan sonra ilk reaksiya ABŞ-dan gəldi. Pentagon rəsmisi Al Arabiya-ya açıqlamasında terror dəhlizinə imkan verməyəcəyini vurğulayan Türkiyə ilə bağlı diqqət çəkən ifadələr işlədib. Suriyada SDG adı altında fəaliyyət göstərən terrorçuları dəstəkləyən rəsmi, "Türkiyənin SDG-yə qarşı hücumlarına bir dəfə də olsun dözməyəcəyik" deyə bildirib.

ABŞ Müdafiə Naziri Lloyd James Austin də dünənki açıqlamasında PKK/YPG terror təşkilatı ilə bağlı "Onlarla yaxşı əlaqəmiz var və bunun davam edəcəyini düşünürəm" demişdi. Austin, "bölgədəki tərəfdaşlarla" yaxın əlaqədə olduqlarını və "vəziyyət dəyişdikcə onlarla məsləhətləşəcəklərini, maraqlarımızı qorumaq üçün doğru addımlar atacaqlarından əmin olduqlarını" bildirmişdir.

Suriyada 27 noyabrda rejim əleyhinə silahlı qruplar ilə Bəşər Əsəd qüvvələri arasında toqquşmalar şiddətlənib. Qruplar 30 noyabr-7 dekabr tarixləri arasında Hələb, İdlib, Hama və Hums kimi ən böyük şəhərlərdə üstünlük əldə ediblər. 7 dekabrda paytaxt Dəməşqə daxil olmağa başlayan qruplara əhalinin də dəstək verməsi ilə rejim Dəməşqdə və bir çox digər bölgələrdə nəzarəti tamamilə itirib, süquta uğrayıb. Baas Partiyasının 61 illik hakimiyyəti sona çatıb, rejim lideri Əsəd paytaxtdan qaçmışdı. Digər tərəfdən, Suriyanın Milli Ordusu dekabr ayında başlanan "Azadlıq Səhəri" əməliyyatının ilk günündə Tel Rıfat şəhərini PKK/YPG terror təşkilatından azad edib. Əməliyyat zamanı Münbiç rayonunun da azad edilməsi ilə Fırat çayının qərbində ən böyük terror yuvasına çevrilən bölgə PKK/YPG-dən təmizlənib. Digər tərəfdən, Deyrzor şəhəri, Meyadin və Əl-Bukəmal rayonlarının nəzarətini ələ keçirən ərəb tayfaları Fıratın şərqində qalan Deyrzor ərazilərində də irəliləyiş əldə edib. PKK/YPG-ni Fıratın şərqinə sıxışdıran ərəb tayfaları Hecin, Şaafe, Bəhra, Qranic, Əbu Hamam, Ziyban, Tayyanə, Dərnaç, Əbu Cərdup kimi yaşayış məntəqələri ilə ət-Tim neft yatağını terrorçuların işğalından azad ediblər.