Ankarada Ukraynanın Müstəqillik Günü Qeyd Olundu: Ticarət, Müdafiə və Krım Tatarları Məsələsi Vurğulandı

Ukraynanın müstəqilliyinin 34-cü ildönümü paytaxt Ankarada keçirilən təntənəli qəbul ilə qeyd edildi. Tədbir Ukraynanın Ankaradakı səfiri Nariman Cəlilovun ev sahibliyi ilə səfirlik binasında baş tutdu. Qəbulda Əmək və Sosial Müdafiə Naziri Vedat İşıqxan, xarici missiya nümayəndələri və çox sayda qonaq iştirak edirdi.

Mərasimin diqqət çəkən hissələrindən biri Ukraynalı idmançılar tərəfindən imzalanmış əşyaların hərrac yolu ilə satılması oldu. Ukraynanın “Şaxtyor Donetsk” komandasının keçmiş texniki direktoru Arda Turanın imzası olan futbol topu, həmçinin ukraynalı idmançıların imzalarını daşıyan forma və boks əlcəyi satışa çıxarıldı. Bu, tədbirə xüsusi maraq qatdı. Bundan başqa, Ukraynalı dizaynerlərin hazırladığı geyimlər də sərgiləndi, bu da ölkənin mədəniyyətini nümayiş etdirdi.

Nazir Vedat İşıqxan çıxışı zamanı Türkiyə və Ukrayna arasındakı strateji tərəfdaşlığın müharibənin yaratdığı çətinliklərə qarşı güclü müqavimət göstərdiyini bildirdi. O qeyd etdi ki, Qara dənizin coğrafi-siyasi əhəmiyyətə malik sahil qonşuları kimi iki ölkə ortaq dəniz hövzəsinin bölgədə və ondan kənarda davamlı sabitlik və rifahın təminatına çevrilməsi üçün birlikdə çalışır. Nazir Krım və Krım Tatarlarının ölkəsi üçün böyük əhəmiyyət daşıdığını vurğuladı. O əlavə etdi ki, Türkiyə Krım Tatarlarının sülh yolu ilə apardığı qanuni mübarizəni qətiyyətlə dəstəkləməyə davam edəcək. İşıqxan, Türkiyənin Ukraynada ədalətli və dayanıqlı sülhün qurulması və müharibənin danışıqlar yolu ilə bitirilməsi üçün intensiv şəkildə çalışmağa davam edəcəyini söylədi. O, Vətən mübarizəsində həyatını itirən Krım Tatarları da daxil olmaqla, bütün ukraynalı şəhidlərin ailələrinə başsağlığı verdi və səbr dilədi.

İkili iqtisadi münasibətlərə toxunan Nazir bildirdi ki, 1991-ci ildə diplomatik əlaqələr qurulandan bəri Türkiyə-Ukrayna əməkdaşlığı müxtəlif sahələrdə çoxşaxəli inkişaf göstərib. Keçən il ikili ticarət həcmi 6.2 milyard dollara çatıb. Türkiyə hökuməti Azad Ticarət Sazişinin mümkün qədər tez qüvvəyə minməsinin ticari əlaqələri daha da irəli aparacağına inanır. Türkiyə Ukraynanın yenidən qurulması işlərində də aktiv rol oynayır. Türk şirkətləri bu günə qədər Ukraynada ümumi dəyəri 10 milyard dolları ötən 300-dən çox layihə öhdəsinə götürüb. Türkiyə və Ukrayna arasında müdafiə sənayesi sahəsindəki əməkdaşlıq isə ortaq tərəfdaşlığın başqa bir əsas sütunudur. İşıqxan gələcək illərdə dostluq və həmrəylik əlaqələrinin daha da güclənəcəyinə inandığını söylədi.

Ukraynanın Ankara Səfiri Cəlilov isə Rusiyanın 11 ildən çoxdur davam edən təcavüzünə baxmayaraq ölkəsinin direnişini davam etdirdiyini vurğuladı. Səfir, dörd ildir ki, tammiqyaslı işğala dirəndiklərini qeyd etdi və düşmənin hərb qaydalarına riayət etmədiyini, yalnız əsgərləri deyil, mülki şəxsləri də hədəf aldığını bildirdi. O qeyd etdi: "Hər gün şəhərlərimiz vurulur, qadınlar və uşaqlar ölür, xəstəxanalar, məktəblər, evlər dağıdılır. Lakin biz hələ də ayaqdayıq və əsla təslim olmayacağıq." Səfir, Prezident Ərdoğana və türk xalqına minnətdarlığını ifadə etdi. O, Türkiyənin Taxıl Dəhlizinin qurulmasında, Ukrayna vətəndaşlarının azad edilməsinə yönəlmiş səylərində, diplomatik təşəbbüslərə verdiyi töhfədə və ən əsası, müharibənin dəhşətini yaşamış ukraynalı uşaqlara göstərdiyi reabilitasiya imkanlarına görə təşəkkür etdi. Bu il 400-dən çox ukraynalı uşağın Türkiyədə psixoloji dəstək və reabilitasiya prosesindən keçməsi böyük bir mərhəmət göstəricisidir.