BYD Şirkət Tarixinin Ən Böyük Geri Çağırışı: 115 Mindən Çox Avtomobil Təhlükə Altında

Çinin nəhəng avtomobil istehsalçısı BYD, öz tarixindəki ən böyük geri çağırma qərarına imza ataraq 115 mindən çox nəqliyyat vasitəsini xidmətə geri çağırıb.

Məlumata görə, geri çağırmaya səbəb 2015-2022-ci illər ərzində istehsal edilmiş Tang seriyası və Yuan Pro modellərindəki dizayn qüsurları və batareya ilə bağlı yaranan təhlükəsizlik riskləridir.

İKİ MODELDƏ CİDDİ BATARYA PROBLEMİ

Çinin bazar tənzimləyicisi olan Dövlət Bazar Tənzimləmə İdarəsinin (SAMR) yaydığı açıqlamaya əsasən, BYD şirkəti Tang seriyası SUV-lərdən 44 535 ədədinin geri çağırılmasını planlayır. 2015-ci ilin martı ilə 2017-ci ilin iyulu arasında istehsal olunan bu nəqliyyat vasitələrində, bəzi komponentlərdəki dizayn səhvlərinin funksional pozğunluqlara yol aça biləcəyi aşkar edilib.

Şirkət, həmçinin, 2021-ci ilin fevralı ilə 2022-ci ilin avqustu dövründə buraxılmış 71 248 ədəd Yuan Pro elektrik avtomobilini də batareya quraşdırılmasındakı istehsal problemləri səbəbindən geri çağırmağa başlayıb.

Qeyd edək ki, BYD bundan əvvəl də təhlükəsizlik riskləri ilə üzləşmişdi. Yanvar ayında yanğın riski səbəbiylə 6 843 ədəd Fangchengbao Bao 5 hibrid SUV modeli geri çağırılmışdı. Daha öncə, 2024-cü ilin sentyabrında isə sükan nəzarət blokunda istehsal qüsuru səbəbindən yanğın riski daşıyan təxminən 97 min ədəd Dolphin və Yuan Plus elektrikli avtomobilə servis xidməti göstərilmişdi.

BİR İL ƏRZİNDƏ TOPLAM 200 MİNDƏN ÇOX AVTOMOBİL

Bu son qərarla birlikdə BYD, son bir il ərzində ümumilikdə 200 mindən çox nəqliyyat vasitəsini geri çağırmış oldu. Mütəxəssislər, şirkətin sürətli böyüməsinə baxmayaraq, keyfiyyətə nəzarət proseslərində baş verən problemlərin getdikcə daha bariz şəkildə üzə çıxdığına diqqət çəkirlər.