Ersin Tatar məğlubiyyətdən sonra ilk dəfə danışdı: "Seçicilər belə qərar verdi"

Şimali Kipr Türk Respublikasında (ŞKTR) keçirilən prezident seçkilərində səslərin 35,81%-ni toplayaraq məğlub olan hazırkı Prezident Ersin Tatar, nəticələr açıqlandıqdan sonra ilk dəyərləndirmələrini verib. O, seçkidə qalib gələn Tufan Erhürmanı təbrik edib və seçicinin iradəsinə hörmətlə yanaşmağın zəruri olduğunu bildirib. Tatar qeyd edib ki, "Seçicilər məhz belə qərar verdilər". Eyni zamanda, seçki nəticələrində bəzi problemlər olduğunu dilə gətirib.

Ersin Tatar seçkiyə müstəqil namizəd kimi üç siyasi partiyanın dəstəyi ilə qatıldığını xatırladıb. O, onu dəstəkləyən partiyaların ümumi səs faizinin aldığı səslərdən daha çox olması lazım olduğunu vurğulayıb. Bu fərqə toxunan Tatar, bunun partiyalar arasında və hətta partiya daxilində mövcud olan müəyyən problemlərdən qaynaqlandığını və bu sıxıntıların da nəticələrə əks olunduğunu bildirib. Prezidentlikdə keçirdiyi beş illik müddətdə daim çalışdığını, yeni siyasət kursu müəyyənləşdirdiyini və ölkənin yolunu açmaq üçün bir sıra layihələrə rəhbərlik etdiyini qeyd edən Tatar, Türkiyə ilə qurulan yüksək səviyyəli əlaqələrin də hər kəsə bəlli olduğunu söyləyib.

Tatar, Kiprin özünəməxsus problemlərinin olduğunu, bunların da seçicinin qərarına təsir etdiyini düşünür. O, Rum tərəfinin hücumları, əmlak məsələləri və ümumi narahatlıqların səsvermənin nəticələrinə yön verdiyini deyib. Keçmiş Prezident bu seçki nəticələrinin gələcəkdə siyasətdə dəyişikliklərə yol açacağına ümid edir ki, bu dəyişikliklər də Kipr Türk xalqının rifahına, azadlığına və xoşbəxtliyinə xidmət etsin. Cənubi Kipr Rum Administrasiyasından (CKRA) gələn təbliğat kampaniyalarının da təsirini qeyd edən Tatar, orada "Tatar gedəcək, Erhürman gələcək, danışıqlar masası qurulacaq" tipli təşviqatlar aparıldığını, bunun da xalqa "ümid pompalamaq" cəhdi olduğunu bildirib.

Ersin Tatar ona yönələn "bir qapı belə aça bilmədi" tənqidinə cavab verərək, Haspolat və Akıncılara sərhəd qapıları açılması təklifini irəli sürdüyünü, lakin təbliğatın bu cəhdləri göz ardı etdiyini bildirib. O, Metehandakı uzun növbələrin Rum tərəfindən yaradıldığını, lakin vətəndaşların bu vəziyyətdən dolayı onu məsul tutmağa çalışdıqlarını qeyd edib. Prezidentliyi dövründə pandemiya, zəlzələ və müharibələr kimi bir çox çətinliklərlə üzləşdiyini, lakin dövlət strukturunu ayaqda saxlamağa çalışdığını deyib. Həyat bahalığı və ölkədəki demoqrafik hərəkətlər kimi məsələlərdəki narahatlıqların isə prezidentlik vəzifəsinə hesab edildiyini söyləyib. Tatar dəstəkləyənlərə və dəstəkləməyənlərə təşəkkür edərək, ölkəsini tanıtmaq üçün yorulmadan çalışdığını və Türkiyə ilə əlaqələri yüksək səviyyədə inkişaf etdirdiyini vurğulayıb. Gələcək planlarına gəlincə, o, bir müddət dincəlməyə ehtiyacı olduğunu söyləyərək sözlərini bitirib.