Kolumbiya Prezidenti Petro: ABŞ Sakit Okeanında Qanunsuz Cəzalandırma Həyata Keçirir

Kolumbiya Prezidenti Qustavo Petro, ABŞ-ın Kolumbiya sahillərinə baxan Sakit Okeanı sularında narkotik maddə daşımaqda ittiham olunan gəmilərə qarşı həyata keçirdiyi hücumları sərt şəkildə pisləyib. Prezident bu əməlləri "məhkəməsiz edam" adlandırıb. Kasa de Narino Prezident Sarayında beynəlxalq mətbuata açıqlama verən Petro, ABŞ-ın Sakit Okeanındakı bu cür hərbi manevrlərin beynəlxalq hüququ pozduğunu və bu əməllərlə insanları qanunsuz cəzalandırdığını vurğulayıb.

Petro ABŞ Prezidenti Donald Trampın Kolumbiyaya maliyyə yardımlarının dayandırılması ilə bağlı bəyanatlarına da cavab verib. O, yardımların kəsilməsinin ölkəyə təsirinin olmadığını deyib. "Əgər bizə yardımı kəsərlərsə, nə olar? Məncə, heç bir şey olmaz. Şəxsən mən Kolumbiya büdcəsində bir dollar belə yardım görməmişəm," deyə Petro bildirib. Prezident yardımların kəsilməsindən ötrü ABŞ hökumətini, həmçinin Mayamidəki Kolumbiyalı sağçı dairələri və lobbi fəaliyyətlərini məsuliyyətli hesab edir.

Kolumbiya lideri, Vaşinqton rəhbərliyinin on illərdir narkotiklərə qarşı apardığı müharibə strategiyasının koka əkinlərinin məcburi məhvinə əsaslandığını və bunun ölkəni "zorakılığa məhkum etdiyini" qeyd edib. Petro, ölkəsinin daxili işlərinə və demokratiyasına ziyan vurulmaması şərti ilə, hökumətinin narkotiklə mübarizədə hər cür işbirliyinə hazır olduğunu bildirərək, ABŞ-ı birgə fəaliyyətə çağırıb. O, hökumətinin narkotiklə mübarizə sahəsində ölkə tarixinin ən uğurlusu olduğunu iddia edərək, "sərt və məcburedici metodlar" yerinə, cəmiyyəti prosesə cəlb edən bir strategiya qəbul etdiklərini söyləyib.

Qeyd edək ki, Donald Tramp əvvəllər Qustavo Petronu hədəf alaraq onu "haydut və pis adam" adlandırmışdı. Tramp Kolumbiyanın çoxlu narkotik istehsal etdiyini əsas gətirərək, "Bu gündən etibarən Kolumbiyaya edilən bütün ödənişləri dayandırdıq," deyə bəyan etmişdi. Bu gərginlik fonunda ABŞ Müdafiə Naziri Pete Hegseth sosial media platformasında Sakit Okeanında hərəkət edən motorlu bir gəminin beynəlxalq sularda narkotik qaçaqmalçılığı səbəbilə təşkil edilən hücum nəticəsində alovlar içində batdığı görüntüləri paylaşmışdı. Hegseth, bu ölümcül hücumun Trampın birbaşa göstərişi ilə edildiyini bildirmişdi.

Kəşfiyyat məlumatlarına görə, hücuma məruz qalan gəminin narkotik qaçaqmalçılığı ilə məşğul olan kartellərə aid olduğu və hücum zamanı gəmidə olan iki nəfərin həlak olduğu iddia edilmişdi. ABŞ ordusunun son dövrlərdə Karib dənizi və Sakit Okeanı bölgəsində narkotik qaçaqmalçılığı ittihamı ilə bəzi gəmilərə hücumlar təşkil etməsi və birbaşa insanları hədəf alması, beynəlxalq aləmdə "məhkəməsiz edam" müzakirələrinə yol açmışdı.