Nigeriyada qanlı toqquşma: Çoxlu sayda ölən var

Nigeriyada ordu ilə "Boko Haram" terror təşkilatının üzvləri arasında baş verən toqquşma nəticəsində 15 terrorçunun öldürüldüyü xəbər verilir. Çox sayda təşkilat üzvü də yaralanıb.

Afrika ölkəsi Nigeriyada ordu "Boko Haram" qruplaşması ilə üz-üzə gəlib. Ölkədə terrorçulara qarşı təsis edilmiş "Hadin Kay" Əməliyyatının komandanlarından Uba Sani yazılı açıqlamasında Borno əyalətinin Kaqa bölgəsində ordu ilə "Boko Haram" üzvləri arasında döyüşün baş verdiyini bildirib.

15 TERRORÇU ZƏRƏRSİZLƏŞDİRİLDİ. Sani qeyd edib ki, toqquşma zamanı 15 terrorçu məhv edilib, çox sayda terrorçu isə yaralı vəziyyətdə qaçıb. O əlavə edib ki, döyüşdə 4 hərbçi də həlak olub, terrorçulara məxsus silahlar və əhəmiyyətli miqdarda sursat ələ keçirilib.

2009-CU İLDƏN BƏRİ ON MİNLƏRLƏ İNSAN HƏLAK OLUB. Nigeriyada 2000-ci illərin əvvəllərindən fəaliyyət göstərən "Boko Haram"ın 2009-cu ildən bəri həyata keçirdiyi kütləvi terror aktları nəticəsində on minlərlə insan həyatını itirib.

Terror təşkilatı 2015-ci ildən bəri ölkənin qonşuları olan Kamerun, Çad və Nigerdə də hücumlar təşkil edib. Qruplaşmanın Çad Gölü Hövzəsindəki hücumlarında ən azı 2 min nəfər həlak olub. Ölkədə terror hücumları və toqquşmalar səbəbindən yüz minlərlə insan məcburi köçkün vəziyyətinə düşüb.