Prezident Ərdoğan qırğın görüntülərindən qəzəbləndi: BMT-ni, Sudanı və Qəzzadakı zülmü qınayırıq

Prezident Rəcəb Tayyib Ərdoğan İstanbulda keçirilən "TRT World Forum 2025" tədbirində çıxış edərkən qlobal ədalətsizlik, müharibələr və beynəlxalq təşkilatların fəaliyyətsizliyi məsələlərinə toxundu. O, Birləşmiş Millətlər Təşkilatının (BMT) hazırkı strukturunu sərt şəkildə tənqid etdi. Ərdoğan bildirdi ki, müharibələr, toqquşmalar və ədalətsizlik bütün bəşəriyyətin gündəmini zəbt edib. Onun sözlərinə görə, BMT Təhlükəsizlik Şurasının (BMT TŞ) ədalətsiz qərar qəbul etmə mexanizmi səbəbindən ümumi problemlərə həll tapa bilmir. Prezident dünyanın beşdən böyük olduğunu bir daha vurğulayaraq, Təhlükəsizlik Şurasının dövrün reallıqlarını əks etdirən yenidənqurmaya ehtiyacı olduğunu açıqladı. Ərdoğan qeyd etdi ki, yer kürəsinin müxtəlif yerlərində günahsız insanların ölməsi davam edir və mövcud imkanlara, texnologiyalara baxmayaraq, uşaqlar ölməyə davam edirsə, hər kəs özünü sorğulamağa məcburdur.

Ərdoğan xüsusilə İsrailin Qəzzaya qarşı hücumlarına kəskin reaksiya verdi və İsraili "günahsız" adlandıranlara cavab olaraq Təl-Əvivin günahsız olmadığını, əksinə, zülmün tam özü olduğunu bəyan etdi. Prezident, nüvə silahının İsrailin əlində olduğunu və istədiyi an Qəzzanı vurmaq imkanının olduğunu bildirərək, İsrailin necə masum ola biləcəyini sual etdi. Türkiyə lideri bu vəziyyəti qəbul etməyəcəklərini, İsrailin hal-hazırda aclığı ölümcül silah kimi, xüsusən də uşaqlara qarşı istifadə etdiyini diqqətə çatdırdı. Əlavə olaraq, bu müddət ərzində 270 jurnalistin qətlə yetirilməsini xatırlatdı. O, Türkiyənin fələstinli qardaşlarını heç vaxt tək qoymayacağını, Qəzzanın bərpası üçün bütün gücləri ilə dəstək verməyə hazır olduğunu və iki dövlətli həlli müdafiə etməyə davam edəcəklərini vurğuladı. Prezident, Fələstini tanımaq barədə verilən qərarları vacib addımlar hesab etdiyini bildirdi.

Daha sonra Prezident Ərdoğan Sudanın Şimali Darfur əyalətinin mərkəzi Əl Fəşir şəhərində baş verən qırğınlara toxundu. O, mülki əhaliyə qarşı törədilən vəhşilikləri vicdan sahibi heç kimin qəbul edə bilməyəcəyini və buna səssiz qalınmayacağını söylədi. Türkiyə lideri olaraq, Əl Fəşirdəki zülmləri ən güclü şəkildə lənətlədiyini və bu hücumların dərhal dayandırılmasını tələb etdi. Ərdoğan, Türkiyənin qardaşlıq hüququnun tələb etdiyi hər şeyi səmimiyyətlə yerinə yetirməyə hazır olduğunu qeyd etdi: "Yetər ki, qardaş qanı axmasın, yetər ki, günahsız uşaqlar, qadınlar və mülki şəxslər öldürülməsin." O, media nümayəndələrini də Sudanlı qardaşlarımızın faciəsini dünyaya çatdıraraq bu mübarizəyə dəstək verməyə çağırdı. Qeyd edək ki, Sudanda ordunun əleyhinə döyüşən Həqiqi Dəstək Qüvvələri (HDK) tərəfindən Əl Fəşirdə 2 mindən çox insan qətlə yetirilib, 48 saat ərzində 250 min insan şəhərdən qaçmaq məcburiyyətində qalıb.

Prezident Ərdoğan qlobal siyasətdən kənarda, cəmiyyəti narahat edən başqa bir məsələyə - ailə müəssisəsinin dağıdılması cəhdlərinə diqqət çəkdi. O, bu gün heç bir ölkənin özünü sərhədləri içində qapalı saxlamaq lüksünün olmadığını və regional problemlərə laqeyd qalmağın mümkün olmadığını vurğuladı. Rusiya-Ukrayna müharibəsi kontekstində isə Türkiyənin sülh üçün ilk gündən məsuliyyət daşıdığını əlavə etdi. Ailə məsələsinə qayıdaraq, Ərdoğan "azadlıq" adı altında hər cür qeyri-əxlaqiliyin qanuniləşdirilməyə çalışıldığını ifadə etdi. O, sosial media platformaları vasitəsilə insan fitrətini heçə sayan sapqın cərəyanların təşviq olunduğunu və ailə təsisatının təməlinə dinamit qoyulduğunu qeyd etdi. İnsanların bir neçə bəyənmə xatirinə məhrəmiyyətlərini açıq şəkildə nümayiş etdirməkdən çəkinməməsi bu çürümə prosesini sürətləndirir.