Şam Düşdü, Əsəd Qaçdı!

27 noyabr, cümə günü başlayıb, bir neçə gün ərzində müxalif qüvvələr, heç bir ciddi müqavimətlə qarşılaşmadan, əvvəl Haləb, İdlib, Tel Rıfat, Həmə və Hums şəhərlərini, sonra isə dünən gecə paytaxt Şamı ələ keçiriblər.

"Əsəd rejimi süquta uğradı!" - belə bir məlumat yayılıb. Müxaliflərin nəzarəti altında olan Şamda hökumət qüvvələri Beynəlxalq Hava Limanından çəkilərkən, Reuters agentliyinin verdiyi son məlumata görə, Suriyanın Baş Qərargahı zabitlərə Əsəd rejiminin devrilməsi haqqında məlumat verib.

Agentliyin verdiyi məlumata görə, Suriyanın prezidenti Bəşər Əsəd Şamdan gizli bir yerə qaçmaq məcburiyyətində qalıb. Bu hadisələrdən sonra Suriyanın baş naziri Məhəmməd Qazi əl-Cəlali çox vacib bir açıqlama ilə çıxış edib.

Baş nazir xalqın seçəcəyi hər hansı bir hökumətlə əməkdaşlığa hazır olduğunu bildirərək, "Mən öz evimdəyəm, hakimiyyətin təhvil verilməsində dəstək olacağam. Dövlət qurumlarının qorunması üçün çağırış edirəm" deyə bəyan edib.

Şama daxil olan Suriyalı müxaliflər "Şam artıq Əsəddən azaddır!" deyə bəyan ediblər. Digər tərəfdən, rejim qüvvələri, Şam Beynəlxalq Hava Limanı da daxil olmaqla, silahları atıblar. Müxaliflər qaranlıq günlərin bitdiyini elan ediblər və keçmiş baş nazirin nəzarətində qalacaq dövlət qurumlarına yaxınlaşmanın qadağan olduğunu bildiriblər.

Xaricdə yaşayan Suriyalılara müraciət edən müxaliflər onlardan azad Suriyaya qayıtmağı xahiş ediblər. Əzab və insanlığa zidd rəftarları ilə tanınan Sədnaya həbsxanasındakı məhbuslar müxaliflər tərəfindən azad edilib.

Şamda insanlar Əməvilər Meydanında bayram etməyə başlayıblar. Minlərlə insan Əsəd rejiminə qarşı şüarlar səsləndirərək şəhər mərkəzində toplaşıb.

Nələr baş vermişdi? 27 noyabrda Suriyanın şimalındakı Haləb vilayətinin qərbində Əsəd rejiminin qüvvələri ilə rejim əleyhinə silahlı qruplar arasında qarşıdurma başlamışdı. 30 noyabrda Haləbin böyük hissəsini ələ keçirən müxaliflər eyni gün İdlibin də tam nəzarətini ələ keçirmişdilər. Şiddətli döyüşlərdən sonra 5 dekabrda Həmə şəhəri də müxaliflərin nəzarətinə keçmişdi.

Müxalif qruplar strateji əhəmiyyət kəsb edən Hums vilayətinin bəzi yaşayış məntəqələrini ələ keçirərək Şama doğru irəliləmişdilər. Suriyanın Ürdün sərhədindəki Dəra vilayətində 6 dekabrda əməliyyat başlayan müxaliflər döyüşlərdən sonra vilayət mərkəzini ələ keçirmişdilər. Ölkənin cənubundakı Suveyda vilayəti də 7 dekabrda müxaliflərin nəzarətinə keçmişdi. Elə həmin gün Küneytradaki yerli müxaliflər də vilayət mərkəzinin nəzarətini ələ keçirmişdilər.

Şamın cənub-qərbində Əsəd rejiminin qüvvələrinə qarşı irəliləyən qruplar 7 dekabrda paytaxtın cənub ətrafına daxil olmuşdular. Hums vilayətində rejim əleyhinə qüvvələr 7 dekabrda şəhər mərkəzinə hakim olmuşdular. Suriyanın Milli Ordusunun Haləb kənarında 1 dekabrda PKK/YPG terror təşkilatına qarşı başladığı "Azadlıq Səhəri" əməliyyatında Tel Rıfat şəhəri terrorçulardan təmizlənmişdi.