Səudiyyə Ərəbistanı İsrailin Qərbi Şəriadakı Qeyri-Qanuni Yaşayış Məntəqələrini İlhaq Etmə Planlarını Şiddətlə Qınadı

Səudiyyə Ərəbistanı işğal altında olan Qərbi Şəria ərazisində Fələstin torpaqlarından zəbt edilmiş qeyri-qanuni yəhudi yaşayış məntəqələrinin İsrailə ilhaqını nəzərdə tutan qanun layihələrinin İsrail Knessetində ilkin səsvermədə qəbul edilməsinə sərt reaksiya verib. Səudiyyə Ərəbistanı Xarici İşlər Nazirliyindən verilən bəyanatda, işğal altındakı Qərbi Şəria üzərində İsrail suverenliyini tətbiq etməyi və qeyri-qanuni məskunlaşmaları qanuniləşdirməyi hədəfləyən iki qanun layihəsinin ilkin səsvermədə təsdiqlənməsinin rədd edildiyi və pisləndiyi qeyd olunub. Krallıq, işğalçı İsrail rəhbərliyinin bütün məskunlaşma və yayılma hərəkətlərini tamamilə qəbul etmədiyini xüsusi vurğulayıb.

Bəyanatda həmçinin Səudiyyə Ərəbistanının Fələstin xalqının beynəlxalq legitimlik qərarlarına uyğun olaraq müstəqil dövlətini, 1967-ci il sərhədlərində və paytaxtı Şərqi Qüds olmaqla qurmaq haqqına sarsılmaz dəstəyi yenidən təsdiqlənib. Rəsmi açıqlamada beynəlxalq ictimaiyyətin öz üzərinə düşən məsuliyyəti yerinə yetirməsinin və beynəlxalq hüquqi qərarların tətbiq edilməsinin böyük əhəmiyyət daşıdığı diqqətə çatdırılıb. Bu addımlar Fələstin torpaqlarına yönəlmiş daimi İsrail hücumlarına son qoyulması üçün gərəkdir.

Səudiyyə Ərəbistanı regionda təhlükəsizliyi və sabitliyi təmin edəcək yeganə yolun iki dövlətli həllə əsaslanan sülh prosesini davam etdirmək olduğunu bir daha qeyd edib. Məlumat üçün bildirək ki, qeyri-qanuni yəhudi yaşayış məntəqələrinin İsrailə ilhaqı haqqında qanun layihəsi dünən İsrail parlamentində ilkin səsvermədən keçdi. Bu səsvermədə 25 deputat "hə" deyərkən, 24 deputat əleyhinə səs vermişdi. Layihənin qanun qüvvəsi alması üçün Knessetdə daha üç fərqli səsvermədən keçməsi lazımdır.