Şinzo Abeni öldürən Tetsuya Yamaqami məhkəmədə bütün ittihamları qəbul etdi

Keçmiş Yaponiya Baş Naziri Şinzo Abeyə sui-qəsd təşkil etməkdə ittiham olunan 45 yaşlı Tetsuya Yamaqami, Nara Bölgə Məhkəməsində keçirilən ilk iclasda cinayəti törətdiyini təsdiqləyib. Yamaqami əl istehsalı silahla Abe-ni seçki çıxışı zamanı vuraraq ölümünə səbəb olmuşdu. Məhkəmə qarşısında duran təqsirləndirilən şəxs, ona qarşı irəli sürülən sui-qəsd ittihamını qəbul edərək, "Doğrudur, bunu etdiyimə heç bir şübhə yoxdur," ifadəsini işlədib. Cinayətin motivasiyası və təqsirləndirilən şəxsin uşaqlıq dövrü ilə bağlı iddialar məhkəmə prosesinin əsas müzakirə mövzusu olub.

Prokurorluq orqanı Yamaqamiyə qarşı qətl, əmlaka zərər vurma və odlu silah qanununu pozma ittihamlarını səsləndirib. İttiham tərəfi qeyd edib ki, Yamaqami anasının "Birləşmə Kilsəsi"nə üzv olmasından sonra bu dini qrupa qarşı güclü kin bəsləyirdi. Onun məqsədi Abe-ni öldürməklə diqqəti və tənqidləri həmin Kilsəyə yönəltmək idi. Prokurorluq vurğulayıb ki, Yamaqaminin törətdiyi cinayətin nəticələri müharibədən sonrakı Yaponiyada "bənzəri görünməmiş" bir hadisədir. Onlar həmçinin təqsirləndirilən şəxsin çətin uşaqlıq dövrünün veriləcək cəzanın azaldılması üçün bir əsas sayıla bilməyəcəyini xüsusi qeyd ediblər.

Təqsirləndirilən şəxsin vəkilləri isə müdafiə xəttini "Birləşmə Kilsəsi"nin üzərində qurublar. Onlar vurğulayıblar ki, Yamaqaminin ailəsinin müflisləşməsinə məhz bu Kilsə səbəb olub. Vəkillər bildiriblər ki, Yamaqami əvvəlcə Kilsənin yüksək rütbəli üzvünə hücum etməyi planlaşdırsa da, daha sonra qrupa dostcasına yanaşdığını düşündüyü bir siyasətçiyə (Abe) hücum etməyin məqsədinə daha uyğun olacağı qənaətinə gəlib. Onlar müvəkkillərinin xarakterinin dini sui-istifadə ilə dolu bir uşaqlıq dövründə formalaşdığını iddia edərək, bunun cəzanın yüngülləşdirilməsi üçün əsaslı səbəb sayılmasını tələb ediblər.

Yaponiyanın ən uzun müddət vəzifədə qalan Baş Naziri olan Şinzo Abe 8 iyul 2022-ci ildə Nara şəhərində seçki kampaniyası zamanı silahlı hücum nəticəsində həyatını itirmişdi. Hadisə yerində tutulan qatil şübhəlisi Tetsuya Yamaqami, dindirmə zamanı Abe-ni anasının müflisləşməsində günahlandırdığı dini qrupa (Birləşmə Kilsəsinə) dəstək verdiyinə inandığı üçün öldürdüyünü demişdi. Dünyada böyük səs-küyə səbəb olan bu sui-qəsd, Kilsənin ianə toplama fəaliyyətləri və Yaponiya siyasəti ilə əlaqələri haqqında ciddi müzakirələrə yol açıb. Məhkəmənin növbəti iclasının şahid ifadələri ilə davam edəcəyi açıqlanıb.