Suriyada Vəziyyət Gərginləşir: ABŞ-dan İlk Bəyanat

Suriyanın şimalında, Beşar Əsəd rejiminin qüvvələri ilə müxalif qruplar arasında beş gündür davam edən şiddətli döyüşlər nəticəsində vəziyyət həddən artıq gərginləşib. Müxaliflər Haləbin əsas hissəsini və İdlibi tamamilə ələ keçirərək, indi də Həmə vilayətinə doğru irəliləyirlər.

Haləb şəhərinin bir çox ərazisi müxaliflərin nəzarətinə keçib və məlumatlara görə, Əsəd rejiminin qüvvələri geri çəkilərkən, əvvəllər PKK/YPG-yə təslim etdikləri Haləb Beynəlxalq Hava Limanını da müxaliflər ələ keçirib. Bu hadisələr ölkədə yeni bir böhranın başlanğıcını bildirir.

ABŞ-dan gələn ilk bəyanatda, vəziyyətin diqqətlə izlənildiyi və son 48 saat ərzində regional paytaxtlarla əlaqə saxlanıldığı bildirilir. Bəyanata görə, Əsəd rejiminin BMT Təhlükəsizlik Şurasının 2254 saylı qətnaməsində göstərilən siyasi prosesə qoşulmaqdan imtina etməsi və Rusiya ilə İranın dəstəyinə etibar etməsi, Şimali-Qərbi Suriyadakı hadisələrin, xüsusilə rejimin müdafiə xətlərinin dağılmasının əsas səbəbi olub.

ABŞ həmçinin, Heyət Təhrir əş-Şam (HTŞ) rəhbərliyindəki bu hücumla heç bir əlaqəsinin olmadığını və HTŞ-nin terror təşkilatı kimi tanındığını vurğulayıb. ABŞ, tərəfdaşları və müttəfiqləri ilə birlikdə gərginliyin azaldılmasına, mülki əhalinin və azlıq qruplarının müdafiəsinə və BMT Təhlükəsizlik Şurasının 2254 saylı qətnaməsinə uyğun, bu vətəndaş müharibəsini bir dəfə və tamamilə sona çatdıra biləcək ciddi və etibarlı bir siyasi prosesə çağırış edir.

Bundan əlavə, ABŞ Suriyada İŞİD-in yenidən canlanmasının qarşısını almaq üçün əsas əhəmiyyət daşıyan ABŞ hərbi personalını və hərbi obyektlərini qorumağa davam edəcəyini bəyan edib.

Qeyd edək ki, 27 noyabrda Haləbin qərb kənarlarında Əsəd rejiminin qüvvələri ilə müxaliflər arasında toqquşmalar başlamış və müxaliflər sürətlə şəhərin mərkəzinə doğru irəliləmişdilər.