Türkiyənin Təhsil Uğuru: 2025-ci il Leiden Dünya Universitetləri Reytinqində 45 Ali Təhsil Müəssisəsi

Niderlandın Leiden Universiteti nəzdində fəaliyyət göstərən Elm və Texnologiya Araşdırmaları Mərkəzi (CWTS) tərəfindən hazırlanan 2025-ci il Leiden Dünya Universitetləri Reytinqinin nəticələri açıqlanıb. Türkiyə Ali Təhsil Şurasının (YÖK) tanıdığı dörd qlobal qiymətləndirmə təşkilatından biri olan CWTS Leiden Reytinqi hər il olduğu kimi, bu dəfə də dünya akademiyasını diqqətlə araşdırıb. Ötən il 1506 ali məktəbin yer aldığı sıralamada bu il iştirakçıların sayı 1594-ə yüksəlib. CWTS Leiden bu reytinqdə Web of Science verilənlər bazasına əsaslanan təhlillərdən istifadə edir. Qiymətləndirmə yalnız nəşrlərin sayını deyil, həm də onların istinad təsirini, beynəlxalq əməkdaşlıq səviyyəsini, açıq giriş performansını və ictimai töhfə potensialını ölçür. Bu səbəbdən, nəticələr universitetlərin akademik dünyadakı real mövqeyini göstərən ən etibarlı göstəricilərdən biri hesab edilir.

2025-ci ilin nəticələrinə görə, Türkiyədən ümumilikdə 45 universitet Leiden Reytinqinin siyahısında öz yerini tapıb. Türkiyə daxilində birinci yerdə, dünya miqyasında isə 302-ci sırada Sağlık Bilimleri Universiteti qərarlaşıb. İkinci yerdə Hacettepe Universiteti (dünyada 378-ci), üçüncü yerdə isə İstanbul Texniki Universiteti (dünyada 564-cü) yer alıb. CWTS Leiden siyahısında Türkiyənin özəl fond universitetlərindən Koç, Bilkent, Başkent, İstanbul Medipol və Sabancı Universitetləri də uğurlu nəticələr göstəriblər. İlk onluğa daxil olan digər türk universitetləri sırasına Ankara (596), Qazi (610), Ege (618), İstanbul (672), Yıldız Texniki (702), Atatürk (749) və İstanbul Universiteti-Cerrahpaşa (766) daxildir.

Siyahı sadəcə köklü və böyük şəhər universitetləri ilə məhdudlaşmayıb; Anadolunun bir çox ali təhsil müəssisəsi də beynəlxalq aləmdə adını eşitdirməyi bacarıb. Ərzurum, Fırat, Çukurova və Səlcuq kimi regional universitetlər də reytinqdə yer alıblar (müvafiq olaraq 810, 900, 913 və 963-cü yerlər). Bu nəticələr Türkiyənin fərqli bölgələrində istehsal edilən akademik biliklərin qlobal miqyasda daha görünən hala gəldiyini göstərir. Sağlık Bilimleri Universitetinin rektoru, Prof. Dr. Kemalettin Aydın bildirib ki, onların ali məktəbi qlobal sıralamada 32 pillə irəliləyərək 302-ci yerə yüksəlib. Bundan əlavə, universitet Biomedikal və Sağlamlıq sahəsində 14 pillə irəliləyərək dünya üzrə 84-cü yerə çıxıb ki, bu da elmi nəşrlərin beynəlxalq təsirinin artmasının bariz sübutudur.

Prof. Dr. Aydın qeyd edib ki, bu nailiyyətlər təkcə sıralama nəticəsi deyil, eyni zamanda ölkənin elm yolunda qət etdiyi məsafənin konkret göstəricisidir. O, universitetin Türkiyənin elmi nüfuzunu və sağlamlıq sahəsindəki liderliyini dünyada möhkəmləndirmək niyyətində olduğunu söyləyib. Sağlık Bilimleri Universiteti təkcə ölkə daxilində deyil, həm də Somali, Sudan, Özbəkistan, Bosniya-Herseqovina və digər qardaş coğrafiyalarda sağlamlıq təhsili və araşdırmalarının lokomotivi olaraq qalacaq. Rektorun sözlərinə görə, bu geniş əməkdaşlıq çərçivəsində bilgi və təcrübənin insanlığın xidmətinə verilməsi SBÜ-nü qlobal miqyasda elm və şəfqət mərkəzinə çevirir. Bu uğur, Türk elm dünyasının qlobal səviyyədə söz sahibi ola biləcəyinin ən güclü dəlilidir.