Vitse-prezident Yılmaz İsrailin Qərb Sahilini ilhaq qərarını qanunsuz elan etdi

Türkiyə Respublikasının Vitse-prezidenti Cövdət Yılmaz İsrailin İordan çayının Qərb Sahili ilə bağlı atdığı addımlara kəskin münasibət bildirib. Yılmaz öz sosial media hesabında paylaşım edərək, Qərb Sahilinin işğal altında olan Fələstin ərazisi olduğunu qətiyyətlə vurğulayıb. O, İsrail parlamentinin (Knesset) Qərb Sahili torpaqlarını öz ərazisinə qatmaq (ilhаq etmək) niyyəti ilə qəbul etdiyi qərarın beynəlxalq hüquqa zidd olduğunu və hüquqi baxımdan heç bir əhəmiyyət daşımadığını bəyan edib.

Vitse-prezident Yılmaz qeyd edib ki, bu cür birtərəfli addımlar regional sülh səylərinə böyük zərbə vurur. Onun sözlərinə görə, İsrailin bu yanaşması Qəzza zolağında çətinliklə əldə olunmuş kövrək atəşkəs prosesinə qarşı yönəlmiş açıq sabotaj deməkdir. Eyni zamanda, bu qərar bölgənin ümumi sabitliyi üçün ciddi və birbaşa təhdid yaradır. Türkiyə tərəfi hesab edir ki, İsrailin Qərb Sahili ilə bağlı təcavüzkar mövqeyi yaranmış gərginliyi daha da artırmaqdan başqa heç nəyə xidmət etmir.

Yılmaz, beynəlxalq birliyi Fələstin xalqına və onun torpaqlarına qarşı yönəlmiş bu aqressiyanın qarşısında durmağa çağırıb. O, xüsusilə Fələstin Dövlətini rəsmi tanıyan bütün ölkələri, eləcə də beynəlxalq hüquqa əsaslanan bütün qurumları hərəkətə keçməyə dəvət edib. Türkiyənin dəstəyi ilə bağlı dəqiq mesaj verən Vitse-prezident, işğal tamamilə sona çatana və iki dövlətli həll yolu əsasında müstəqil Fələstin Dövləti qurulana qədər məzlum Fələstin xalqına dəstəyin davam edəcəyini ifadə edib.