Apple, Siri-ni İnkişaf Etdirmək Üçün OpenAI ilə Əməkdaşlıq Edə Bilər

Apple şirkətinin gələcək nəsil Siri-nin hazırlanması ciddi gecikmələrlə üzləşir və bu layihənin irəliləməsi üçün xarici mənbələrlə əməkdaşlıq ediləcəyi məlum olub. Yeni sızmalara görə, Apple, Siri-nin arxasındakı böyük dil modeli infrastrukturunu gücləndirmək üçün OpenAI və ya Anthropic kimi süni intellekt şirkətləri ilə tərəfdaşlıq etməyi nəzərdən keçirir.

Uzun müddət "LLM Siri" adı altında daxili olaraq hazırlanan yeni nəsil assistentin mart 2025-ci ildə təqdim edilməsi planlaşdırılırdı, lakin bu tarixə yetişmədi. Gecikmələrdən sonra Apple, layihəyə yeni istiqamət vermək üçün əhəmiyyətli bir idarəetmə dəyişikliyi etdi. Vision Pro komandasının rəhbəri Mayk Rokvel, Siri və süni intellekt təşəbbüslərini əlaqələndirməkdən məsul lider təyin edildi. Bu dəyişiklik, baş icraçı direktor Tim Kukun əvvəlki lider Con Ciannandrea-nın fəaliyyətindən narazı qalması səbəbindən baş verdi.

Rokvelin komandası Apple-ın öz dil modelini bazarda olan digər modellərlə müqayisə edərək geniş testlər keçirdi. Qiymətləndirmələrdə OpenAI-ın ChatGPT, Google-un Gemini AI sistemi və Anthropic-in Claude modeli təhlil edildi. Son məlumata görə, testlərdə ən yaxşı nəticəni Claude modeli göstərib. Bildirilir ki, bu nəticə Apple-ın gələcəkdə hansı süni intellekt təminatçısı ilə əməkdaşlığı dərinləşdirəcəyinə qərar verəcək.

Digər tərəfdən, Apple hazırda "Apple Intelligence" adı altında OpenAI ilə işləyir. Apple, 2025-ci ildə təşkil etdiyi Ümumdünya Proqram Təminatçıları Konfransında (WWDC) Siri-nin yeni nəsil süni intellekt xüsusiyyətlərini ictimaiyyətə təqdim etmədi. Şirkətin marketinq üzrə rəhbəri Qreq Cosvik bildirdi ki, hazırda inkişaf etdirilən texnologiya hələ Apple-ın keyfiyyət standartlarına cavab vermir. Proqram bölməsinin vitse-prezidenti Kreq Federiqi isə Siri-də gözlənilən əsas yeniliklərin 2026-cı ildən əvvəl gəlməyəcəyini söylədi.