Avropa Starlink'ə rəqib yaradır: Eutelsat'a milyardlıq investisiya

Avropa kosmosdakı rabitə gücünü artırmaq üçün əhəmiyyətli bir addım atıb. Böyük Britaniya və Fransa, qitənin ən böyük peyklə əlaqədar operatorlarından biri olan Eutelsat şirkətinə ümumilikdə 1,5 milyard avro yatırım ayırıb. Bu dəstək, Avropanın ABŞ-ın SpaceX şirkətinin Starlink şəbəkəsinə qarşı mövqeyini gücləndirmək məqsədini daşıması ilə əhəmiyyətlidir.

Eutelsat-dan verilən açıqlamaya görə, Böyük Britaniya hökuməti şirkətə 163,3 milyon avro investisiya qoyacaq. İyun ayında Fransanın elan etdiyi 750 milyon avroluq maliyyə ilə birlikdə bu töhfə şirkətin imkanlarını xeyli genişləndirir. Böyük Britaniyanın investisiyası ilə ümumi dəstək 1,5 milyard avroya çatıb. Fransa maliyyələşdirməsi ilə Eutelsat-ın ən böyük səhmdarı olacaq, Böyük Britaniya isə şirkətdə 10,89 faiz pay saxlayacaq.

Böyük Britaniyanın Elm və Texnologiya naziri Peter Kyle kosmosa qarşı artan təhlükəsizlik təhdidlərinə diqqət çəkərək, davamlı və fasiləsiz peyklə əlaqənin Avropanın milli təhlükəsizliyinin əsas elementi halına gəldiyini bildirib. Açıqlamada qeyd olunub ki, kosmos texnologiyaları yalnız elmi və ya ticari deyil, həm də strateji və müdafiə yönümlü hala gəlib.

Eutelsat hazırda 34 konvensional geostasionar peyklə və 600-dən çox aşağı orbitli peyklə fəaliyyət göstərir. Bu, Starlink-dən sonra dünyanın ikinci ən böyük peyklər donanmasını təşkil edir. Dəstək və xüsusilə Fransadan olan investor marağı sayəsində Eutelsat səhmləri 2025-ci ilin əvvəlindən bəri 64 faiz artıb. Bu Avropa investisiyası yalnız texnoloji inkişaf üçün deyil, həm də qitənin rəqəmsal suverenliyi üçün əhəmiyyətli bir mərhələni qeyd edir.

Kosmik infrastruktur üçün belə bir dəstəklə Avropa ABŞ-a məxsus şirkətlərin qlobal üstünlüyünə alternativ sistemlər qurur.