CES 2025-də təqdim olunan robot insanı xatırladır

CES 2025 sərgisində Realbotix şirkəti tərəfindən təqdim olunan Melody adlı yeni humanoid robot hər kəsi heyrətləndirib. Texnologiyanın sürətli inkişafı ilə artıq həyatımızın bir çox sahəsində robotlardan istifadə olunur, amma Melody kimi real görünüşlü robotlar bu gələcəyin nə qədər yaxın olduğunu bir daha göstərir.

Qorxulu dərəcədə real görünüşlü Melody, klassik humanoid dizaynlarının canlanmasıdır. İlk baxışdan filmdən çıxmış bir siber-insanı xatırladan robot, realistik üz cizgiləri ilə diqqət çəkir. Realbotix, robotun üzünün dəyişdirilə biləcəyini bildirib. İstifadəçilər Melodynin üzünü çıxarıb fərqli üz və ya saç düzümü ilə əvəz edə bilərlər, yəni robot fərdiləşdirilə bilər.

Robotun daxili quruluşu da təsir edicidir. Melodynin skelet quruluşu realistik şəkildə dizayn edilib, hətta göz bəbəkləri, dişləri və diş ətləri belə real görünüşə malikdir. Hazırda Melodynin hansı sahələrdə istifadə olunacağı tam aydın deyil. Lakin, Realbotix-in bu cür humanoid robotları sosial qarşılıqlı əlaqə, təhsil və əyləncə sektorlarında istifadə etməyi planlaşdırdığı məlumdur.

Melody bir tərəfdən robot texnologiyalarının nə qədər inkişaf etdiyini göstərsə də, digər tərəfdən insan bənzərliyi ilə yaratdığı qəribə təsir səbəbindən mübahisələrə səbəb olub. Hətta sərgilənən robot, robot texnologiyalarının etik və estetik sərhədlərini yenidən düşünməyə məcbur edir. Gələcəkdə humanoid robotlar həyatımızı necə dəyişə bilər? Melody kimi robotların artması cəmiyyətə necə təsir edər?